來到最後一日﹐因為天氣好﹐心有不甘﹐想睇多一日櫻花睇下會唔會比尋日更靚﹐所以... 由周街亂行變為去新宿御苑。
不過出發前﹐K.O.埋尋晚買o既果杯唔知係咪足一杯o既燉蛋先! 噫喂﹐真係足一杯喎﹐食在勁飽!! 最後食唔晒!!
係太陽城太子Check Out﹐將行李Keep好在係Counter之後﹐阿麵帶我係東京Metro兜來兜去﹐十點幾到新宿御苑﹐都算好方便‧‧‧
哩度要俾入場費o架﹐張飛咁攪鬼哩.... 原來一入門口佢就收在喇! 好彩映在先至入門口咋。
今日都仲係好凍﹐係無太陽o既位置會覺得好涼；哩度好大﹐不過櫻花樹就無上野咁多咁密﹐有 D 零落....
暫時個場最桃紅的一棵櫻花樹﹐可能就係得佢一棵o既關係﹐好多人埋黎映相﹐有D花俾人搖到跌晒落地下﹐可能聽日黎會再甩得勁多~
然後再入公園深處映相﹐好多都係偶爾會見到一棵半棵﹐池塘邊會無啦啦有一棵的﹐究竟係其他連花蕾都未出﹐定真係咁疏落呢?!
其實我覺得淡櫻花唔夠震撼﹐係JR站有張Poster Sell人去東北睇櫻花﹐張Poster全部都係桃紅色櫻花﹐果D先夠勁呀!
哩度都好多人黎野餐﹐但無上野咁多﹐同埋哩度係草地﹐田園感重D! 我諗係因為哩度要俾入場費哩!
玩飽映飽睇飽﹐唔早喇﹐要走喇﹐我地仲要去食多餐Lunch、仲有o野未買同埋要番去接番兩個o急；照睇我地番新宿個距離應該唔係太離譜﹐想行番去﹐但我急性子o既性格又來了﹐行在兩個街口就同阿麵講﹐我地不如撘Metro番去啦‧‧‧
番新宿買埋小小o野﹐終於見到我想食o既魚形的鯛魚燒﹐仲有三種口味選擇添! 夠細條﹐唔怕太飽﹐因為我地仲要Encore大江户呀!
番到池袋﹐去大江户開飯﹐因為果日係另一間o既迴轉壽司食得唔暢快!
開始時間緊迫﹐快手order啦﹐迴轉帶上唔見的就唔好等喇~
食飽飽﹐番酒店喇! 沿途見到 Limousine﹐雖然方便﹐但太貴喇﹐所以睇下就算 Lu~ 再見到我地留連過的Family Mart﹐除在酒店樓下果間之外﹐哩間算行得最多o架喇；仲有個藍藍的天空.... 突然諗起早幾日落雨。
又再一次的池袋六十通﹐一陣拖住個o急我仲邊有手映相o丫....
酒店外貌同四周圍o既街景.....
走喇~~~ 去到池袋JR站﹐其實個個站都有扶手電梯的﹐都唔知邊個講無﹐攪到黎果陣阿麵要一手一o急咁托個o急上地面﹐我地今次精在喇﹐搵扶手電梯。
去到上野﹐原來行好鬼遠先至到京成本線的﹐今日係星期六﹐極多人黎睇櫻花﹐條路打晒交﹐想行快D都唔得!
去到見到有班四點的快車﹐買飛買錯在﹐閘入唔到﹐感覺住果架車開走....
然後去Counter問﹐佢話下一班要4:40pm﹐太遲喇!!!! 去到機場咪成六點?! 我地飛6:20pm喎﹐然後問佢咁京成本線呢? 我地張飛唔o岩Value﹐問佢可唔可以變番普通﹐佢話可以﹐但攪得黎﹐我地要撘4:23pm果班京成特急﹐去到機場要5:39pm﹐好擔心﹐不過都無法子啦。
去到機場﹐飛奔去惡晒航空o既Counter﹐D地勤有小小訝異我地咁遲先到﹐但都好好禮貌幫我地攪寄行李﹐我地係度講笑﹐佢地會唔會諗『哩兩個荗利有無攪錯﹐咁遲o既?!』然後攪掂晒之後﹐佢地特登搵人幫我地推番兩件Luggage去寄﹐而我地就跑去過 Immigration﹐有個地勤幫我地拉開 D 繩﹐我唯有講在聲唔好意思啦!!!!
行去飛機時﹐俾我地係登機閘口見到醫臣太太﹐噢... 肯定佢又試過黎入貨啦~
機師熄晒燈咁起飛﹐睇住日本o既夜景﹐其實都真係幾靚﹐漸漸地睇唔到地面喇‧‧
番到香港﹐係 A 車上面﹐我好想好想食o既唔係無敵家o既拉麵或刺身﹐我反而好想食一個大福﹐哈哈....
墨麵Honeymoon之旅正式完滿結束喇!
