好緊張呀‧‧聽日就可以睇到果日o既天氣喇。
雖然﹐今日睇預報唔代表一切﹐但起碼初步知道會如何吧。
求求上天你幫幫手啊~~
2009年4月27日 星期一
東來居
又到一年一度喇﹐又到ar mui生日喇﹐今年我地選擇打邊爐!!
ar mui 帶我們來﹐當然特別推薦呀! 有舒適的四人卡坐﹐枱面放食物的位置都很足夠﹐還有混醬架﹐鐘意怎樣混就怎樣混!!
還有特別的清熱菊花飲品‧‧其實今晚未打邊爐已經熱氣得要命!!!
一桌子美食呀~~
飲飽食醉之際﹐突然ar mui 唔舒服﹐仲唔舒服到聲到變埋﹐我地就即刻結帳同佢離開喇﹐陪佢去埋睇醫生。
由於豬流感關係﹐醫院嚴陣以待。我地入到去﹐都無謂嚇親街坊﹐一人一個Mask先啦!! 經醫生睇過之後﹐可能係ar mui對某類食物敏感﹐是以我同Bevis都無事。
我地真係多事三人組﹐某年同一目的但係九龍塘食飯﹐一樽Sangeria攪到我地好似醉酒咁係又一城Toilet狂嘔；上年﹐唔敢飲勁度酒精﹐飲輕度的Cocktail﹐某人都暈佗佗；今年無酒精﹐就相會於醫院﹐我地真係『多事三人組』了。
阿Dee的婚宴
先說明﹐我咁多年都改唔到口﹐我平時係叫新郎哥做Billy的﹐改唔到口叫阿Dee﹐你要怪就怪Miss Chong啦﹐幫你改哩個名。
尋日係Billy的大婚日﹐我帶埋阿麵去觀禮。
教堂係葵涌﹐不知算不算天公造美﹐因為他們的大婚日﹐下的只是連綿不絕的毛毛雨﹐並非像星期六朝早的大雨。
不知那來的構思﹐他們用了這樣的一對Wedding Doll。
說實話﹐真的有點驚嚇。
晚宴係有『飛天南瓜車』果間度舉行﹐哩間酒樓出現了那麼久﹐還是頭一躺去飲宴。
個Backdrop係酒樓的﹐但好Ok喎! (聽聞個玫瑰花底係酒樓的。)
今晚我地以前舊同學剛好一枱﹐其中兩個好少見的﹐我都同佢地Reserve在我結婚果日佢地要黎飲o架喇!
全晚三個Video﹐每一個都超爆笑﹐一個介紹入場、一個播成長片段、第三個係新郎精心策劃送俾新娘子的禮物﹐雖然係好笑到震﹐但新娘喊到唔識收聲﹐並聲言一直以來都怪責新郎毫不浪漫﹐但在大婚日總算破格了!! 有夠爆笑的構思﹐但玩得o既朋友亦唔少得﹐幸好佢地o既朋友都非常投入幫手拍片﹐就算入鏡、有對白都在所不計。
哩一個總算係哩幾年去o既婚宴中最突出o既一個。
2009年4月25日 星期六
陳然‧你好
JC 剛榮升爸爸﹐我們今日約好去探過BB來。遠是遠了點﹐柴灣哦﹐我係一個少過海的人﹐還要說柴灣?!?! 坐地鐵都覺得有點遠。
陳老豆打算帶埋陳媽媽同埋陳BB避走香港﹐預計七月左右會離開﹐連我果餐都等唔切﹐唔可以睇住BB長大喇﹐希望第時陳老豆會耐唔時就Update下我地﹐佢地一家三口o既生活狀態啦。
中間有段時間同陳媽媽閒聊﹐傾起攪結婚o既o野﹐都問在佢一D意見；點解問佢?? 因為佢本身係做新娘化妝o架囉﹐見得哩D Case多嘛‧‧原來佢D衫都係唯美度租﹐不過佢有兩件婚紗﹐一件係唯美、一件係第二間租的；另外﹐亦都交流在一D首飾o既意見﹐佢仲即刻拎在佢結婚D相我睇添!!
第一次見豬腳薑裡加入木耳同冬菇﹐令唔食豬腳薑的我都試一試。
BB﹐祝你快高長大呀!!
2009年4月22日 星期三
頭紗
最近好努力咁搵映相o既物資﹐不停係咁周圍睇人地D相﹐Yahoo Auction都唔放過。
某日﹐行到去一個Blog度﹐見到人地頭紗好靚﹐仲係婚後物資出售添﹐正呀! Contact個Blog主啦﹐點知俾其他人快我一步要在個頭紗了；問下個Blog主係邊度買o架啦﹐但佢話係佢個mua幫佢整o架喎﹐咁即係無得買啦﹐唉~~
睇過好多sample﹐大部份都係超長的﹐即拖地o既款黎﹐自問並非高人一族﹐並唔知道究竟哩D o既唔o岩自己﹐但覺得﹐長到腰果D應該好D掛；係網上面搵果D又唔係平﹐動不動都百幾蚊一個﹐見有JM話其實自己動手整都可以啦╴小小手作仔呀﹐咁有人就放工走在去佐敦買料。
神下神下﹐係咪佐敦料貴定我買得太多﹐我買完先至覺得好貴哦﹐一D都唔平哩。
點知今晚去在接對婚紗鞋番屋企﹐係金都二樓見人係度玩頭紗﹐睇埋一份﹐點解有個咁似果個Blog主話係mua幫佢整果個o既?!?! 哩次笨蕉喇... 其實買料都買在成半價錢﹐仲要唔知我攪唔攪得掂﹐早知買好過啦~~~
請問有無人可以映頭紗頂部o既Close Up我睇呀?! 雖然有D概念﹐但想再睇清楚D呀。
2009年4月21日 星期二
2009年4月18日 星期六
水鞋
早於一個月前左右﹐某朝番工大雨﹐我雖然有帶傘﹐番到office後﹐我對鞋係完全濕透的﹐可憐此鞋子大約兩個月就要受沖涼之苦呀。因為大部份o既鞋如果濕了水﹐都很容易會膠水老化﹐繼而拖底、或張開口要食o野一樣 etc etc。
當然啦﹐我鞋子濕了水﹐一定是變殘了的哦﹐還張開口要吃東西一樣﹐只是勉強說看不到腳趾而已。
其實去年都試過不知多少次﹐朝早番工下大雨﹐但晏晝就無雨了﹐可憐腳板給雨水浸住一天﹐up足一日﹐後期時係穿拖鞋番工﹐但公司枱底總有一對在office穿可以像樣一點都高跟鞋。
早幾天看天氣報告﹐下星期很可能又來大雨了﹐我投降了﹐我今年一定要買水鞋﹐我唔想我D鞋咁快玩完。當年第一次看到Crocs的鞋﹐覺得好古怪﹐怎麼這膠鞋的賣相那麼古怪?!?!
當年此鞋一出﹐米高極力推介﹐話又好著又易襯衫﹐仲話乜衫都襯到﹐但當我睇到o既時候覺得﹐攪錯‧‧點襯斯文裙呀?!?!! 以前覺得點都唔買哩種啦﹐都唔靚。
然後去年見人地著哩一種﹐不過,,, 心覺得﹐一對膠鞋會唔會腳臭??!
不過今年有人耐不住﹐都加入行列了﹐雖然遲了一點﹐但都希望保得住我今年的鞋呀!!
我唔係唔想Simple & Elegant
我每月都有買一本婚紗雜誌睇﹐我明白好多朋友都話唔好買﹐無咩用﹐"side"錢。但其實‧‧我覺得好好睇o架。
雖然我已經揀在第一次衫(即係confirm埋係邊間)﹐但我依然覺得哩D書好好睇﹐其實一本哩D﹐我真係一本咋﹐同我以前一個月四本東週 + 四本東方新地﹐咪已經平在囉。次次見到D衫﹐我都有猶豫﹐究竟哩種會唔會o岩自己多D呢。
其實係網上面有好多comment﹐好多新娘子成日話要簡潔o既婚紗﹐外國果D simple & Elegant 係最好。阿水唔知咩﹐但話晒人人骨架唔同﹐其次‧‧我覺得香港o既條件係有D唔同o架。
係外國﹐好大部份都唔係擺酒﹐佢地好似興係Ceremony + Day Time o既Wedding Party﹐就算有Banquet﹐應該都唔會好似香港咁大排延席﹐廿幾三十圍等住你﹐所以梗係可以simple & elegant啦﹐同埋我承認﹐我都覺得Day Time係陽光底下o既Ceremony﹐真係一件Simple o既婚紗已經好足夠﹐就算無石、無閃都好正。但係香港嘛‧‧大家要計算埋夜晚Banquet﹐一計到話晒夜晚o既晚宴﹐Simple? 無石? 唔閃?? 唔跨?? 仲要個場係深色o既?! 我覺得係大家未必會留意到新娘企在係邊囉。
同埋婚紗晚裝﹐真係要著上身先會知咩Style o岩自己。你係雜誌睇一款你覺得『Eee.. o也... 最怕哩一種』偏偏著得你最靚o既係佢﹐又或『Wow... 好鐘意哩件呀』分分鐘著上身﹐睇到你粗腰又平胸。唉‧‧所以嘛﹐大家真係要花D時間去搵哩。
唉‧‧點解我無啦啦出個咁o既Blog﹐事源哩﹐咪就係因為我覺得﹐自己揀在D閃閃地o既衫後﹐又未係爆閃o既﹐件婚紗同晚裝夜晚會好o岩(因為我正正係個場會暗的)﹐但Day Time時婚紗好似有小小 over 在﹐咁我宜家又執緊D雜誌喇喎﹐一路執一路睇﹐覺得好頭痕‧‧‧﹐點解唔可以有D中庸D o架。
2009年4月16日 星期四
如何擊退電話Sales的方法
某日、某公司、某同事﹐收到一個電話﹐打來自唔知『安X』定『邦X』財務公司﹐問同事是否需要借貸。
***********************************************
Sales：『你好﹐請問係咪XXX先生?』
同事：『係!』
Sales：『你好呀﹐我地係XX打黎o架﹐請問你有無卡數要清﹐需要私人借貸呢?』
同事：『有呀... 我有好多卡數。』
Sales：『唔知先生你o既卡數大約有幾多呢??』
同事：『好多喎‧‧真係好多喎。』
Sales：『我地o既貸款額係可以高達五十萬格。』 <--- 自以為已經好多喎‧‧
同事：『唔夠喎﹐太少喇。』
Sales：『er... 我地都可能可以去到一百萬o架。』
同事：『都仲係唔夠喎﹐我都話有好多卡數咯。』
Sales：『咁唔知先生你需要大約幾多左右呢?』
同事：『我‧‧er‧‧都大約需要一百六十萬左右。』
Sales：『err.. 噫... 都真係好多喎﹐err... 超過在我地個額﹐我諗我地幫你唔到喇。多謝晒你D時間。』
同事：『哦‧‧咁由佢啦。Bye Bye』
***********************************************
當電話一收﹐我同另一同事即刻爆笑﹐因為阿同事係對住Speaker講的﹐所以周圍o既人都聽得一清二楚。
我地又多在個方法知道點樣可以turn down D 電話sales喇。
2009年4月15日 星期三
Function Test美食之Oliver's Cookies
我地大大話話都係QA部﹐所以我地都有一個小小的Lab﹐有時要試各種各樣o既sample﹐真係拎件外套番屋企試著都試過。
食得o既o野都唔少﹐包括蘋果(切蘋果刀)﹐奶昔(打奶昔攪拌器)、西瓜汁(打果汁攪拌器)﹐今次有得食o既係曲奇餅!!
我明白大家都會為我身型著想﹐放心﹐每次o既份量我都好節制o架。今次﹐我只食了兩塊咁大把。
不過... 坐係Lab附近的Merchandiser就慘D﹐曲奇味雖香﹐但聞得耐﹐果個漏o既感覺係超難頂的。
我食在兩塊﹐其中一塊仲要燶在﹐第二塊無燶﹐仲好原始o既德國口感 (硬) 添!! 今次係測試做英文字母的盤是否成功造出英文字。
但偏偏係無『J』又無『F』囉!
2009年4月13日 星期一
花拉生日慶典之 - BB蕉 + 釣魚
尋日同一眾前 B記同事去在BB蕉 +釣魚﹐玩慶祝花拉牛一。
首先入去o既第一批朋友係會釣魚的﹐先攞在BB蕉場先‧‧
然後就出魚排喇~~
Package提供魚具與魚餌‧‧
不過D蝦仔有D霉‧‧
此乃大部份人都靠佢食糊的八爪鈎‧‧
我地全部人都有釣到魚呀~~ 我都有份哩。我係用單鈎釣o架﹐唔係用八爪鈎chok 的。
六點零鐘就番去開始BB蕉了﹐魚鑊可以拎走﹐不過我地拎都無用﹐所以無要到﹐放番佢地落海﹐不過聽講‧‧大部份都死了﹐因為俾八爪鈎鈎死了。
哩次Party好開心﹐耐唔時玩下戶外活動﹐輕輕鬆鬆釣下魚﹐都唔錯。
2009年4月12日 星期日
青馬大橋觀景台
繼復活節假第一日去在九龍仔公園映相﹐本來無諗住咁快又出動﹐但因為尋日晏晝見超好天﹐絕對有可能係傍晚時份有得映咸蛋黃﹐就叫麵去玩多一日喇。
今次見係想影咸蛋黃﹐所以就揀一個比較有大片天空o既地方o勒﹐最後揀在青馬觀景台。
我地好晏先至出動﹐去到已經四點幾喇。始終地方隔涉﹐唔係太多人。
讚唔讚佢好呢?!?! 咁坦白話你知觀景台已經無Toilet喇﹐要去就哩車場隔離哩個度解決啦。
行上去喇‧‧有條天橋﹐仲有苦力一個。
Wowwooo... 到廣場了~~
其實哩度都幾Ok﹐仲有汀九橋同青馬大橋做背景﹐耐唔時會有D遊客黎睇風景o架。我尋日仲見到好多唔知講邊個國家語言o既遊客﹐佢地好驚奇哩度有人著婚紗映相﹐我十足十好似公仔咁﹐佢地圍住我黎睇﹐我除在回報點頭與微笑﹐已經唔知仲可以做D咩咯~~
請問有無人知﹐邊度仲有以下o既佈景版?? 我想要搵多D其他顏色﹐我想要紅色、紫色、綠色﹐etc etc。
如有人知記住通知我呀~~
自家製 Pre-Wedding之九龍仔公園 (油麵初試版)
早排﹐特登去在天后買在件玩外映o既婚紗﹐拖在咁耐﹐終於有用武之地喇。
由於攝影師同Model 都係超新手﹐請各位多多包涵。
仲要笨到有人唔記得帶鋼紗﹐所以條裙o既Pattern唔係睇得好清楚。
我地會再練習映好D o架喇。
2009年4月11日 星期六
九龍仔公園
尋日﹐我地去在一個好耐都無去o既地方﹐公園。宜家係鬧市之中﹐都唔會再有新o既大型公園o架喇﹐所以果D已經有N年歷史的舊公園﹐已經差不多絕版o架喇。尋日我地去果個係九龍仔公園。
如果唔係爸媽每每星期日都去跑跑步做運動﹐我都差D遺忘在哩一個公園。回想細個小時候﹐嫲嫲總係會提及『九龍仔個泳池水好深﹐你唔好去呀!! 好危險!!』我都好乖﹐我從無去過o丫~~~ 係從無呀!
尋日再到哩個公園﹐好似對哩個公園一D印象都無‧‧
由延文禮士道入口行上去﹐有條車路上去﹐媽話其實可以把車泊上去﹐不過我地去到時已經Full在﹐咁我地泊延文禮士道咪標算了。其實... 如果唔係驚D Toilet唔掂﹐連車都唔駛開。
D公園長椅好新好靚哩。
有好大片草地喔~~ 哩個叫洋紫荊園﹐如果大家有留意﹐就會知宜家康文署有D政府公眾公園可以俾人行禮用﹐哩個洋紫荊園就係其中一個了。
早在最當初﹐我地係有諗過係哩度行結婚典禮﹐不過公園就係公園﹐除在俾個草地你之外﹐就係百無。櫈我唔係好肯定喇﹐但總之就係乜都要特別安排﹐所以思前想後﹐都係唔好攪咁多o野喇﹐如果真係係度攪﹐我諗我果日就唔會放輕鬆心情去Enjoy 個Wedding Day o架喇﹐我一定會親自出手﹐以防各位兄弟姊妹唔明我本來想點攪o架。
其實哩個公園D景好靚呀﹐因為附近唔係太多高樓大廈﹐因為以前附近有啟德機場﹐樓都唔可以起太高﹐係宜家無在咯﹐附近o既樓先至越起越高。
想睇相?? 呵呵呵呵‧‧我都未睇呀~~ Ok o既先算啦~~~
2009年4月8日 星期三
泰色生香
早幾晚﹐去完唯美玩 1st Trial﹐然後就去搵飯食﹐四個人﹐唔知食咩好﹐就揀在以前我同 ar mui 都試過o既一間泰國餐廳﹐因為想飲冬蔭公。
間o野叫『泰色生香』﹐舖仔細細﹐但味道都好夠；四人叫了一個冬蔭公、一個炒菜、一碟生蝦、一碟木瓜絲沙律、一碟六串的串燒、一碟咖哩蝦﹐老闆送了一碟蒜蓉飽、然後我地加單自己再要多一碟蒜蓉飽添。
當晚傾得好開心﹐仲有電視睇﹐ 不過回家後卻發生了不愉快事件。
因為我地有食生蝦刺身﹐食之前大家都互相講怕唔怕食生蝦喇﹐大家都本住食就食啦o既心態黎Order﹐好大無畏哩﹐仲講笑有咩事Sick Leave幾日然後就到Easter Holiday喇。點知第二朝﹐麵話佢瞓到第二朝有肚痛o既情況出現﹐我無明顯o既痛但花係厠所o既時間無疑係耐在格；到在番到公司﹐收到ar mui 來電話佢痛足一晚無得瞓仲嘔到七彩添﹐攪到佢真係Sick Leave在一日；而Bevis就完全無事﹐唔知關唔關係佢食得特少哩‧‧(因為佢其實怕辣o架)。
其實我地果晚食o既時候真係無事(食都有事就一早唔食啦)﹐不過個冬蔭公係幾油﹐就算想撥走油層都唔係咁容易；而生蝦... 我同麵都各自食在2隻、Bevis一隻而 ar mui 係食在3隻。究竟係咪真係生蝦出事哩?!?! 我地真係唔知喇‧‧
辛苦了 ar mui 喇﹐今次真係清清腸胃喇﹐下次我地係街食生蝦真係要慎重考慮呀。
2009年4月7日 星期二
唯美主義 1st Trial
我尋晚去在1st Trial 喇。
約在七點﹐準時到﹐舖面無咩客人﹐佢地就快快手拎我之前Hold在o既10件衫出黎俾我睇多次﹐今次再睇﹐原來有D其實我唔係咁鐘意o既都Hold在﹐睇上去都唔多想o既都即時Foul在﹐大約有三件左右啦﹐但係舖面都即時加番幾件去試。揀好晒就入舖o既盡頭裡面o既Fitting Room準備試衫﹐同行o既有我、男友、同兩名友人。
佢地可能當時無咩客o既關係﹐有三個Sales幫我試衫﹐一個拉住個廉、一個幫我拉埋裙拉鍊﹐一個係前面按住條裙同埋幫我拉好胸前o既位。
首先試在四件婚紗：
1 - 前面有個Pattern好似豬腦咁﹐唔鐘意﹐Foul。
2 - 佢地話新番﹐不過我今晚係Yahoo Blog搵到同一件衫上年已經出在場﹐我估可能哩件係重新造多件o既『新』掛﹐心型胸同腰都修得好靚。
3 - 我一直鐘情o既婚紗﹐係Yahoo Blog Search唯美婚紗都會見到佢﹐朋友話哩一條一睇就會覺得係我o既Style。
4 - 哩件拖尾係四件入面最靚o架﹐但腰位修得唔好﹐條腰線條好粗。
輪到晚裝﹐總共試在七件：
1 - 豆沙紅漸變色﹐唯一一件我揀係要用鋼紗﹐但朋友話心口無晒線條。
2 - 杏色似旗袍款A Line有小拖尾﹐但太淺色﹐怕映相唔覺﹐同埋我試果件超殘﹐起晒紗。
3 - 鮮紅扮旗袍款有拖尾﹐其實我對咁紅麻麻地﹐不過Sales姐姐極力推介﹐就即管試下啦；不過著上身未行出黎俾佢地睇時﹐已經超唔慣﹐俾佢地睇完之後﹐朋友話我Carry到件衫﹐但件衫不中不西有D唔知想點咁﹐佢地亦睇唔慣我著咁鮮紅色。(+_+)
4 - 銀白色Base Color + 綠色胸前蝴蝶結 A Line﹐男友 + 兩位朋友話超讚﹐唔駛考慮﹐一定要。
5 - 上粉藍下粉紅 +藍色胸前絲帶蝴蝶結A Line﹐有吊帶﹐但佢地話顏色唔襯我﹐同埋我著吊帶麻麻地。
6 - 上黃下粉紅 Low Cut A Line﹐Join Package時Hold完﹐番屋企睇到人地張相都覺得怪怪地﹐所以都無寄予厚望﹐同場試完﹐三人都完全無反應、無Comment。
7 - 銀色Low Cut閃閃(其實件件都閃)﹐著得好瘦﹐自己超鐘意。
全個過程用在唔駛一個鐘﹐可以試到十一件都算超快﹐上次Match Frame足足用在二個鐘先試在10件左右﹐最後Hold在我大早已經鐘意o既 3 號婚紗﹐而晚裝就揀在1、4、7號。
雖然晚裝1號唔太鐘意﹐但係有限o既Quota裡面最可以襯金器敬酒o既一件﹐Hold住先算﹐到時2nd Trial任試時再試其他紅色o既晚裝睇下有無得轉啦。
番到屋企樓下﹐先至醒起﹐Hold在果D全部都係Low Cut款﹐睇黎﹐2nd Trial時要小心D試下其他款喇。
最後多謝 ar mui 有mark低 notes﹐如果唔係我邊有記得咁清楚邊件打邊件。Thank you!
2009年4月5日 星期日
訂閱：
文章 (Atom)