九點幾落到北九產房﹐
姑娘叫我地先去Toilet﹐否則一穿在水無得落地﹐只可以係床上面去大去小。
去完Toilet 問姑娘我要去邊張床﹐發現隔離床就係四月媽媽會的準媽媽﹐
她尋晚穿水已經進來了﹐估到會相見但無諗過正正係隔離床。
姑娘先幫我把閱讀Baby心跳及我陣痛頻率的機器Set 好﹐
等在一陣﹐醫生來了﹐我知她是來幫我穿水的...
她穿起手套﹐然後叫我把腳掌對腳掌的放好﹐她就用一把剪伸進去....
其實我很緊張﹐就當她好像還在找位置的時候﹐我心卜通卜通的跳﹐
突然一陣暖水由下體流出來﹐我就知道﹐羊水穿了....
羊水流出來的感覺好怪異... -_-
然後有姑娘來我的左手邊﹐帶來了兩瓶東東要給我吊的﹐
她先在我左手抽了兩支血﹐然後再將那黃豆再推入﹐嘩... 痛屎了~
就係咁﹐催生開始了。
呆呆的坐了一個鐘多一點﹐中途都是不停的在聽斜對面那太太痛苦呻吟﹐
我一邊在想﹐我遲點會唔會好似她那樣﹐
還是會比她更亂叫呢??
偶爾跟四月媽媽會那準媽媽閒聊幾句﹐她都好像已經有氣沒力了﹐
當然啦... 進得這房間的都差不多不能吃東西﹐
可以吃的人也沒胃口吃吧...
姑娘不停係我地身邊行來行去﹐不停看我們有甚麼需要﹐或看看每人的儀器是否正常運作；
大約十一點﹐有個姑娘查看我那些儀器﹐
當時我的陣痛不算厲害﹐
我問她：『姑娘﹐那我宜家算幾分鐘痛一次??』
她竟說：『仍然未有規律。』
我心諗... OMG
唯有安靜再等下吧...
大約十二點﹐開始陣痛厲害了點﹐
但一直以來聽其他已生產的媽媽話：『痛到死都無一度。』
我見自己未Feel 到痛到死﹐應該仍未入流。
一直安靜地承受那大約一、二分鐘一次的陣痛﹐
大約十二點半左右﹐我覺得有便意﹐但好好奇﹐不是臨生得先有o架麼?!
當再有姑娘係我附近出現時﹐我就問姑娘﹐為何我那麼早就有大便感覺﹐
姑娘話有大便感就好﹐因為阿B 自己都準備緊出世了；
那天早上﹐阿麵還有去番工﹐因為覺得點快都唔會快到半日吧﹐
但因為前一晚我心已好驚﹐阿麵就說﹐番半日工﹐下午就到門外等啦；
等了很久﹐終於一點﹐阿麵可以來看我了﹐
但因斜對面床那太太仍在做檢查﹐要待她完成才可以﹐
但姑娘也進來點一點人數﹐聽到她說我也有家人來探﹐我就知是麵了!!
大約一點二十分﹐終於阿麵可以進來了﹐
我第一眼見到阿麵﹐明明之前不算很辛苦的我﹐麵還未行到我床﹐眼淚我都已經流下來了﹐
是撒嬌嗎??
也許吧﹐因看到隔離床的四月媽媽會朋友﹐也跟我一樣的在眼紅紅﹐
明明我倆之前很安靜﹐沒說辛苦或是甚麼的﹐
麵也做不到甚麼﹐只可以幫我抹眼淚、拿Tissue﹐
回拿走一些我不想放在病房的用品﹐
然後就係拖著我﹐讓我安靜的抌在他手臂上感受陣痛﹐
當時已經很痛了﹐還有那越來越烈的便意﹐
偶爾還有想突然睡著的感覺﹐
二點了﹐
麵要出去了﹐
非常不情願但又無法子﹐
唯有叫他先去吃點東西；
同一時間﹐醫生也準備來替我檢查﹐
都不認得是否今早那醫生了﹐
她戴起手套就伸手去摸﹐
如果我要形容﹐她手勢就像搓麵粉一樣﹐
不停的撥來撥去﹐
當然﹐我也只能夠痛得面容扭曲﹐
其實用唔舒服來形容比較貼提﹐
醫生撥了一會﹐手伸回來以後就跟我說﹐
『好叻喎﹐已經開在五至六度了﹐加油啊!!』
What?!?! 五至六度
原來已經五至六度!!!
我要笑氣啊!!!!
但姑娘Check完後﹐所有笑氣被其他準媽媽Hold了﹐
要三點先至再有；
無甚麼可以做﹐
我又不打算做無痛分娩﹐
唯有繼續忍那陣痛及攪肚痛但不能去廁所的大便感；
聽到姑娘說﹐
下一次Checking會係五點﹐
二點至五點仍要這樣子忍?
我一分鐘都不想再忍了
突然有個念頭係腦入面轉出來﹐
明明今朝十一點還說陣痛未入流﹐
但二點已說開了五至六度﹐
如果五點前已經生得﹐但無人同我Check﹐
我又係第一次﹐如果唔知自己生得﹐會唔會對Baby有影響?!?!
二點四十分﹐看來姑娘交更了﹐
逐個 mama 的 record在看﹐
其中一個唔知係姑娘定助產士很串咀﹐
當她們來到我眼前﹐我忍不住就跟姑娘們說話了
小墨：『姑娘我好驚啊。』
串咀姑娘：『你驚乜呀? 你驚先生趕唔切來陪產呀?』
小墨：『唔係呀﹐你地話下一次幫我Check要五點﹐
我好驚由宜家至五點﹐我生得你地唔知﹐我未生過﹐自己生得又唔知﹐好驚影響在BB呀。』
串咀姑娘：『唔駛驚﹐如果你無陣痛但又有想大便感覺你就話俾我地知啦。』
小墨：『我宜家就係有囉。』
串咀姑娘：『真係?! 係咪o架。』<~ 她在慢條斯理中
小墨：『嗚... 我唔知呀...』
然後串咀姑娘去拿手套﹐邊拿邊問我問題﹐例如幾點去過小便﹐會唔會係想小便咋；
她戴好手套又把手伸進去探了一探...
突然她說：『痾啦。』
我心諗... 痾?! 痾乜呀?!?!
都唔明佢講乜
佢連講在幾次痾啦﹐我都唔明；
最後我問串咀姑娘：『姑娘﹐你叫我痾乜呀? 大定小定B呀??』
串咀姑娘：『痾B呀!』
o下!
咁我話：『我生得o架喇咩?!?!』
串咀姑娘：『姑娘話得你就信啦﹐咁你宜家生唔生o丫』
小墨：『生得梗係生啦。』
然後即管用力了幾下﹐
好快她就放手﹐並跟其他姑娘說我可以進產房了；
嗚... 麵﹐你食飽返來未呀?!?! Baby 要出世喇~~
然後﹐在姑娘眼中可能動作好快﹐但係我眼中佢地係Dum時間﹐
攪在成15分鐘先至真係推我離開產前房﹐
我見佢地動作咁慢﹐我一見佢地行開完回來我就問....
小墨：『請問搵到先生未呀?』
串咀姑娘：『未打電話。』
五分鐘後...
小墨：『請問先生係出面未呀?』
串咀姑娘：『未搵。』
再五分鐘後...
小墨：『姑娘請問搵在我老公未呀?』
串咀姑娘：『我仲幫你Set 緊o野﹐未得閒搵﹐宜家搵啦。』
然後見佢打電話出去叫其他姑娘搵先生了
Confirm在麵係出面﹐我都安心D﹐
佢幫我打完電話﹐然後就教我點樣擺腳、點樣用力﹐
但其實我都唔多掌握到
佢只係叫我﹐有陣痛時就用力去大便啦﹐
過在一陣﹐終於見到麵了﹐
嗚... 即刻又喊﹐
就係不停係用力、休息、用力、休息後﹐
都仲未生到﹐
得串咀姑娘一個係產房睇住我地兩個﹐
佢仲要坐得好鬼遠咁睇住我﹐
我心諗『你係咪玩o野呀?!?!』
但無法子...肉隨針板上﹐
繼續用力、休息、用力、休息﹐
開始多在一、兩個姑娘入來Stand By﹐
黎到哩度佢地真係似樣D﹐
似番個產房﹐
佢地開始幫我打氣﹐
叫我要一鼓作氣﹐
唔好浪費自己氣力﹐
我再係咁唔夠一氣呵成﹐
就只會越來越唔夠力﹐
我心開始荒了﹐
唯有出盡九牛二虎力量再努力﹐
後來見佢地越哄越埋﹐
應該真係生得喇﹐
聽到助產士話：『要幫你剪一剪呀o下...』
Oh No... 唔剪得唔得呀?!?!
黎到哩度梗係唔得啦﹐
淨係Feel 到一下痛﹐
同埋佢地仲用手幫Baby出世﹐
我用力多幾下同埋長氣 D 添﹐
最後 Baby 真的出世了﹐
我兩正式Upgrade為父母﹐
我地屋企正式成為三口之家了。
2012年5月17日 星期四
40 Week 4 Days - 八小時生B 實錄
2012年4月25日 星期三
2012年4月17日 星期二
39 Weeks 5 Days - 是有跡象嗎?
來到39W5D﹐Baby仍然無乜跡象幾時出世﹐乜我肚皮真係咁好住?!
尋日就好似平時一樣﹐出街早餐、午餐、晚餐﹐
晚飯我無煮好耐喇﹐買又唔係好掂、煮又唔係好掂﹐所以日日街飯。
但尋晚有小小古怪﹐有D久違了的肚痛感覺回來了﹐對了﹐係以前M Come前肚痛的感覺啊!!
同埋典解尋日連腰痛都出埋o既?!?!
晚飯後拿拿林番屋企﹐重新點一次入院走佬袋內面的o野﹐加埋洗面、刷牙之類的東東入去﹐唔知會唔會凌晨就有特殊感覺呢?
Baby﹐媽媽緊張喇﹐係咪你要出黎喇?!?!
好緊張啊!!!
當然... 今日仲有閒係樹打Blog﹐結果就係仍然等運到中~~~
唉... Baby﹐仲要等幾耐呀?!?!
2012年4月11日 星期三
38 Weeks 6 Days - Mark 在催生期了
唔經唔覺﹐已經來到38w的尾聲了﹐Baby仍然係肚入面開心快活；
今日番醫院檢查﹐醫生已經順便Mark埋催生期；
如果一直Baby未自然出世﹐將會係40W3D入醫院﹐40W4D催生!
問在醫生小小問題﹐因為Baby係面仔向我肚的﹐係咪難生D架??
醫生話﹐開宮頸會慢一D啦﹐同埋問佢係咪催生會痛D﹐因為落藥的問題﹐所以會有小小痛!
(小小?! 醫生你都講得好保險喎。)
醫生建議我一係行多D﹐但我行多D又痛﹐醫生話無法子喇﹐始終佢自己未出黎都無辦法；
離開徐展堂大樓﹐落到街突然覺得有D驚﹐九個幾月以來順產o既勇氣一下子唔知去晒邊﹐
突然有小小後悔﹐早知去C+ 啦﹐咁應該已經開在刀﹐唔駛日日係度15/16了﹐唉...
打電話俾麵﹐眼淚不自主的流下來了﹐是的﹐我真的突然好驚啊﹐
阿麵鼓勵說其實媽媽同Baby已經好努力了﹐Baby其實一直都好乖啦﹐無令媽媽有好多唔舒服﹐
咁又係﹐Baby其實一直都好乖﹐同埋到宜家都未出世都唔係錯﹐人地話40W嘛﹐佢只不過無早到﹐
媽媽又因為Annual Leave的關係早在放假﹐先至令到個『等』期咁長。
然後﹐我就好似傻婆咁﹐由登打士街行去白英奇果邊一間BB用品店﹐
然後又行番去Baby Outlet﹐再上朗豪坊﹐然後又走番去登打士街睇Snoopy產品﹐
有點腳仔軟﹐所以撘在三個站巴士去BB Care﹐再係BB Care樓下撘巴士番沙田。
行多D o丫嘛﹐唯有係咁啦﹐唔係點樣行多D o即...
2012年4月2日 星期一
37 Weeks 4 Days - 放假第二星期開始
上星期有阿麵陪足一星期﹐今個星期開始就得我自己一個了。
Baby﹐你係肚肚入面點呀?! 好唔好玩、開唔開心呀?? 媽媽去食果D o野好唔好味呢??
今個星期有兩日公眾假期﹐即係爸爸只需要番三日工﹐嘿嘿...
我地日日等爸爸放工番黎陪我地呀o下。
踏入37w﹐Baby開始有點份量了﹐晚晚我個肚都好痕﹐妊娠紋爆到七彩﹐
搽油搽Cream都只係希望唔好咁痛咁痕﹐已經不望爆少D了﹐一有紋﹐多與少都不是大問題了。
今日番過醫院檢查﹐講在上次拿樣本做的B鍊Checking﹐我係無事的；
Yeah﹐Baby少個威脅、媽媽又打少幾針﹐Good!
2012年3月26日 星期一
36 Weeks 4 Days - 自製前四後八
上年自去完台灣回來﹐就開始研發墨B﹐沒有甚麼請過假﹐除了聖誕及新年；
所以足足留了八日大假﹐好彩HR Approve﹐造就了AL + 產假共前四後八﹐
哩一日﹐Mar 26﹐就係我第一日正正式放的假﹐
希望墨B唔好心急出來見爸媽﹐因為佢真係有點輕磅啊﹐
阿麵話阿囡應承在爸爸38w先至見人﹐乖喇囡﹐爸爸話你應承在就係o架喇﹐
咁就38w 見啦!!!
2012年3月11日 星期日
34 Weeks 3 Days - 唔願郁
仲有幾個星期我墨B 就出世喇﹐越來越唔願郁﹐懶洋洋咁；
墨B墨B﹐你記住未夠鐘﹐唔好未足月就出黎呀﹐對你唔係好事黎o架。
某日﹐係屋企動手洗在D衫仔﹐但洗完果次之後﹐暫時又停在工了﹐
太陽伯伯今年係咁哩埋﹐都唔出黎幫下手﹐
雖則話我地屋企就算出太陽﹐太陽都入唔到屋﹐不過有太陽的話會比較乾爽﹐感覺都好D；
對上果次見林醫生﹐Baby你已經佔領晒房入面o既每一個角落﹐媽媽已經唔可以係4D裡面見到Baby你個樣喇﹐
唔知你似爸爸定係似我呢? 仲有幾個星期就會見到了。
爸爸同媽媽研究緊要買個櫃番黎裝好你o既用品﹐但爸爸仲揀緊o丫... 希望佢快手D啦﹐
個窗台已經擺滿晒你o既用品了﹐僅餘o既光線就黎都入唔到屋喇。
同埋Baby你好似細粒在小小﹐媽媽會盡量飲番多小小奶﹐
不過係屋企早餐一點都不易﹐因為媽媽多了懶床﹐遲在起身﹐煮唔切通粉o丫...
BB你好快就會出黎俾爸爸媽媽抱﹐但媽媽會好唔捨得獨佔你的時光﹐
當你出在世之後﹐我會記住你係媽媽肚入面轉的感覺﹐左郁郁右踢踢。
期待...
2012年2月10日 星期五
30 Week 1 Days - 護協及大圍姿彩
但我平時邊度拎到咁多o野o丫﹐所以趁今日產檢﹐阿麵同我一齊先至去買。
我地只係去在兩站﹐第一站係佐敦護協!
早幾日已經去過一次收集情報﹐所以今次叫做有小小Target !
要格價的都差不多了﹐亦唔想太花精神格價得太仔細﹐所以執得就執!
最最最抵係果包棉花球﹐500粒$32﹐係市面上應該無第二度更抵了吧?!
M巾﹐都唔理有扣無扣﹐是但啦.... 一樣一包吧!
跟據朋友仔所指﹐濕紙巾還是大張一點較好﹐無咁容易一手黃金﹐
況且她說Huggies的不錯﹐照執如儀。
同之前係網上店見ChuChu的洗奶樽清潔劑﹐好似最平係護協了﹐買啦買啦~~~
我地有自備購物袋﹐用少D膠袋o丫~~
然後落樓下寶靈街買毛巾!!!
三條大毛巾兩條迷你毛巾。
下一站大圍姿彩買Chu Chu奶樽﹐有Special Package﹐四大一細奶樽Package價$335!!
本來朋友叫我唔駛買專用的清潔刷子﹐係我自己唔想煩﹐買啦﹐唔好諗了。
點知俾我見到大圍姿彩本來話無貨的Chu Chu洗奶樽清潔劑番貨了﹐仲要平過護協﹐暈了....
買入在哩D o野之後﹐個心叫做定D﹐唔會好似乜都無係手﹐擔心都少D。
30 Week 1 Days - 產檢
但今次因為Book唔到林翠苗晏場﹐唯有早早去完C+﹐然後先至再過廣華。
9:30am Appointment﹐準時!
今次準備在好些問題要問﹐所以都多在o野問醫生；
Baby今日30週了﹐墨B﹐你仲有八個星期就可以出世o架喇(足月)；
乖呀... 唔駛心急出黎見Mammy Daddy﹐我地往後仲有幾十年見﹐唔急~唔急~ 但唔該唔好遲到喔~
今次映到Baby正面!!
其實BB樣係4D入面﹐我真係覺得都係差不多的... 所以無花錢去Baby Icon照4D；
好彩林醫生都開俾我睇在陣﹐仲幫Baby映在小小玉照﹐哈哈...
離開診所﹐論到番廣華了﹐唔知今次要等幾耐哩...
10點25分左右到﹐淨係等叫名量血壓、磅重、檢小便都等在半個鐘﹐駛唔駛呀...
今次仍然係一號房﹐唔知仲係咪上次個斯文男醫生呢?
等待o既時間係慢長的... 成日見其他房叫名﹐但等極一號房都叫得特別慢....
終於係一個鐘零十五分鐘後論到我了....
今次係一個女醫生...
先交低血糖紀錄、醫生問夠唔夠飽...老水都答佢夠啦...不過對住林翠苗我就話『有偷食囉...』
然後瞓上床聽Baby心跳﹐用軟呎度Baby Size﹐
醫生再入黎用手按Baby...噢...醫生你可以細力D嘛?? 人肉來的﹐會痛喎!
一切無乜特別﹐佢話Baby樣樣正常﹐醫生問有無係C+ 照超聲波﹐梗係答無啦....﹐
我地香港人難得係政府拿到o既福利﹐我係唔會拱手讓人o架!
然後我問醫生﹐係咪遲D有B鍊檢查做﹐醫生話35-37週先至做﹐無咁早；
最後姑娘提醫生我係時候抽血做中期血色素所以要抽血﹐
唔該完醫生一論就出在門口﹐去俾姑娘吉一針.... 抽血了....
臨走係Counter拿下次o既預約紙﹐一張係U/S﹐另一張係下次產檢﹐Yeah~~
攪掂晒就散水﹐好肚餓... 同阿麵去食Lunch喔~~
2012年2月7日 星期二
29 Week 4 Days - Baby 摺疊浴盆
不過屋企始終細﹐本來決定貴都照買啦﹐如果唔係個盆仔都唔知擺邊度好；
點知今日係四月媽媽會有人Post在團購摺疊浴盆喎!!
當然... 哩D梗係平極有限﹐極其量只可以話比朋友仔用緊果個牌子平小小﹐
不過唔緊要啦﹐鬼叫屋企無位咩...
我唔係講笑o架﹐係真係無地方擺原隻盤仔﹐哩D唯有用錢解決問題。
已經買在喇﹐叫做比原先慳在$100左右。
2012年2月4日 星期六
29 Week 1 Days - TT奶煲及奶樽
因為如果我拎好像有點論盡﹐等到尋晚﹐等阿麵放工來幫我拎佢番屋企；
一直都以為包四個奶樽的﹐但番到屋企開盒Check﹐Oops... 原來入面係無樽的!
之不過朋友早前已經俾在一袋TT樽我﹐但... 唔係正常BB樽﹐
有D係好似學習杯果D咁﹐反正... 嬰兒期應該暫時用不著；
但朋友已幫我慳了三百多元﹐我唔好意思再問佢奶樽事宜﹐所以... 要自己入手了。
市面上有好多牌子﹐真係花多眼亂﹐
有跟哩個牌子的TT樽、Nuk、Pigeon、Chu Chu、Bfree、Dr. Brown、Avent etc etc
Avent 一直有說邊飲邊漏奶...
Bfree parts 很多﹐如果無工人姐姐實在不建議﹐因會洗到暈在﹐
云云中比較多人讚好的有Chu Chu﹐但Chu Chu差不多已經係最貴果隻﹐
而... 又唔係每個BB 都o岩﹐要睇番BB o既脾性﹐
係四月媽媽會﹐有媽媽又同我講佢大女用TT又用得唔錯﹐
唉... 揀BB o野真係好煩﹐
一日未Confirm﹐一日就會係樹15/16﹐
其實我諗... 我主要會考慮TT或Chu Chu﹐
但... 邊隻好呢邊隻好呢?!?!
BB﹐不如你話俾媽媽知啦...
29 Week 1 Days - 老麥早餐
諗起果個薯餅﹐真係好想一啖咬落去!
終於...星期三果日試在啦...
正呀~~
當然﹐最大問題係血糖問題﹐
其實我哩個星期都超晒標﹐Check唔Check都係咁；
但... 我都係有心去Check下﹐食老麥早餐係點o架呢?
星期三﹐首先試豬柳漢堡餐 (即連薯餅及奶茶)；
老麥奶茶咁淡﹐都唔怕Baby飲多一兩啖；
竟然... 兩小時血糖只係4.3﹐簡直係驚喜!
既然咁低... 我星期四再做另一次測試﹐
就係進攻豬柳蛋漢堡餐 (又係連薯餅及奶茶)；
Wow.. 都只係5.4﹐直頭興奮....
不過.... 血糖低唔代表咁樣食法Ok﹐
因為﹐油份好勁的﹐今朝上磅﹐Sorry.. 哩個星期重在1 Kg﹐
嗚嗚... Baby﹐我地下星期都係乖乖地食番自家通粉做早餐好了。
2012年1月23日 星期一
27 Week 4 Days - Buffet 甜食
今次去在帝京酒店食 Buffet﹐食Buffet 又點少得甜品呢?
仲要係熱葷麻麻地吸引... 最後K.O. 了下面哩D甜品。
Wow... On the way番屋企時﹐Baby 你手舞觸蹈o丫﹐好興奮係咁跳舞o丫...
So Cute~~
我知其實我宜家唔應該食甜品﹐
不過... 年初一價值五百幾一位o既Buffet﹐唔食實在對唔住自己!!!
2012年1月10日 星期二
25 Week 5 Days - 跟餐單
自從上星期去完廣華One Day Camp﹐就開始試食低醣餐了﹐
買在一包紅米﹐因為話溝紅米o既血糖指數無升得咁勁﹐我地哩D『飯人』最好都係咁食好D。
由開始要減醣開始﹐墨麵之家o既晚飯就變成在碟頭飯餐﹐
每晚只煮一個餸﹐以肉類為主﹐因為我需要食肉補鐵質及蛋白質﹐另加烚菜或烚瓜﹐
有時覺得阿麵好可憐﹐好似俾好少o野佢食咁﹐佢話無問題﹐咁樣好好喎....
但我真係有點內疚的﹐無辦法﹐唯有俾大碗小小飯同汁佢當補償!!
終於係上星期五係廣華正門小賣部購入在測血糖機一部﹐
買試紙 ($210) + 針 ($70) 就送血糖機一部!
再試兩度﹐有血但唔夠﹐仲Error﹐浪費我一張試紙!!!
最後三度就次次都Ok﹐為免再浪費我試紙﹐我決定以後都用三度去篤!
我地o既飯餐來來去去都係果D....
大家樂o既扭扭粉早餐一直係我的至愛﹐哩一日特登試下佢﹐噫... 比我想像中低喎。
仲有午餐去在椰林閣﹐K.O.在一個包﹐飯食在一半。
不過﹐測試夠了﹐係時候日日跟番餐單了﹐
始終為著Baby著想﹐係好應該跟醫生o既建議o既。
2012年1月3日 星期二
24 Week 5 Days - 廣華糖尿 One Day Camp
本來醫院要我 Dec 29﹐但我要求改到一月頭!
七點零起身﹐刷牙、洗面﹐整早餐。
預備要八點剛剛好食飽! 因為10點係醫院姑娘要篤手指!
準時九點去到醫院﹐個入院登記Counter 竟然係A&E﹐仲要鬼死咁長龍﹐Short o架?!
上到病房都成九點二十分了,,, 幸好唔係最後o既一個；
間房有八張比較舒適的櫈﹐都好... 唔駛坐膠櫈...
姑娘係度登記人名﹐好輕鬆....
今日有七個人﹐有一個放在飛機﹐否則應該係八個。
要著住件黃色袍﹐等於係病人o既服飾先至可以周圍行。
10點﹐第一個抽血﹐姑娘仲教埋我地點篤自己手指﹐哎o也... 好鬼驚!!!! 但都要硬住頭皮篤!!
數值7 以下係正常﹐7以上要即抽血再Counter Check﹐但要入院o既機會都好高；
有個媽媽一篤﹐數值9.9﹐嘩~~~ 典解只係食在早餐都咁金?!?! 我地一致認為佢係食錯o野；
但... 無論咩原因﹐姑娘話佢都要搵日入院過夜做Monitoring!
到我自己﹐手震震... 一Check.... Yeah... 4.6 咋!!!
支血糖針就同Red Cross捐血篤手指支針一樣﹐好死痛呀衰鬼；
早餐後o既數值只有果位9.9媽媽唔合格﹐其他的都過關；
十點幾近十一點﹐有BB沖涼睇﹐哎o也.... BB沖涼好得意呀~~~
然後十一點半左右﹐營養師來了﹐會一個一個單對單Review我地過去幾日o既餐單!
我地個營養師覺得都幾惡﹐個款10足10當年我係B記時﹐忙到甩轆果陣一樣即... 講o野好掘!
佢睇到我會早餐食晒一包快熟通粉就已經開始丙!
我：『係呀...乜有六份咩﹐但望落去咁少o既。』
營養師：『你食到超晒標喇。』
我：『但我食在之後個幾鐘又餓o架喇喎。』
營養師：『你應該做o既係少D粉但加番D肉﹐可以加隻雞蛋或火腿﹐唔係狂擺澱粉質入口。』
營養師：『典解你幾日都無寫生果o既?!』
我：『我...我我... 真係無食生果。』
營養師：『你咁樣唔得o架喎﹐點都要食D格﹐飲食點可以咁唔均衡。』
我：『我好多生果唔食o架﹐我會食果D食在個胃又唔多舒服﹐我有胃酸倒流。』
我諗阿營養師差D俾我哩個唔多聽話o既病人激死。
見完營養師之後就到在食飯時間﹐
今日Lunch係蝦醬蒸肉片同烚小棠菜；
我地七個圍埋一齊食飯﹐
有D媽媽不停話D肉片好難食﹐地仲要一邊食一邊彈﹐又話屋企都唔會咁煮肉片云云﹐
係差但我又唔覺差成咁喎﹐係就係淡味D﹐但醫院餐係咁o架啦﹐我夠想無事去食家鄉雞啦~~
飯後我地落在正門隔離果個小賣店睇血糖機﹐
姑娘話有人話佢知﹐果度有二百幾蚊一Set 套裝賣﹐但出面淨機可能已經要五、六百。
有時哩個世界真係一樣米養百樣人﹐
間小賣店淨番一千零一部機﹐我地就七個人一齊問﹐
其中一個第二日就產檢o既媽媽就話自己急住用﹐因第二日要產檢﹐
另外有個媽媽第二日要上大陸﹐無咁快番來﹐但間o野又無貨﹐
其實我覺得第二日就產檢果個媽媽唔急要機囉﹐跟本今日先Check完﹐淨係得晚餐度數就無意思；
我個人覺得應該讓俾要番大陸個媽媽先囉。
三點幾﹐終於可以篤第二次手指﹐心諗死就死啦....
點知.... 好好彩﹐6.0咋! 攪掂了!!!