屋企的上網線終於裝好﹐USB上網手指已經送回去給傻哥﹐我終於有正經o既上網線用。
由搬過黎到宜家剛過在一個月多D﹐哩段時期都係靠傻哥借出USB手指﹐如果唔係﹐我哩個病態網民都真係會發癲﹐日日番到屋企都無得上網﹐唔癲就怪咯....
我霸住在部Notebook﹐但Desktop是我以前在舊居已經在用的﹐麵舊居的那部Desktop已經昏倒了﹐我與麵宜家各據一電腦﹐但其實... 我兩部都想據為己有‧‧‧
婚後﹐終於有時間冷靜下來﹐天氣很好的星期天下午﹐二人在家一人一腦埋首網路世界﹐本小姐病了一星期﹐一星期那都不敢去﹐飯不敢煮﹐很乖巧的安坐家中休息了﹐竟然... 婚後令我乖乖地坐低的﹐係病... 但....安靜下來卻有點無聊的感覺﹐怪怪的...
搬進新居後﹐最不習慣的﹐是溫度!
從前在舊居﹐我只有寒流襲港時才會穿上長袖衫跟長褲﹐但來了新居後﹐就天天都長袖衫長褲﹐還要外加一件外套、穿拖鞋﹐坐在家裡﹐都會震震震震震!
早前經常都在14、15度﹐每天都穿上很多衫﹐開始覺得煩﹐所以天氣稍微回暖就急不及待的只穿薄衣上街去﹐回到家裡又懶醒的開窗通風；已試過好幾次好像要病﹐但都在未發作前就給打低了﹐但哩次‧‧‧我終於輸了.....
近年﹐睇醫生就覺得非常麻煩﹐因為都唔知看那個醫生好﹐五、六年前開始覺得﹐由我還是一個手抱嬰兒時開始看的那個醫生所開的藥不太靈光﹐就開始流浪生涯﹐每次病都15、16﹐看那一個好呢?? 好友曾推介我去浸會看門診﹐藥不是不靈﹐只是.... 非指定醫生﹐那跟我去看其他街症有什麼分別?? 還有的是﹐有些人負擔不來那比一般醫生貴的醫藥費﹐但他們都不是看普通醫生都可以嗎?? 所以我都沒堅持了....
今次﹐我又在15、16看那個醫生﹐最後隨意在屋企附近看一個；麵有點反應﹐他說附近的醫生都只是一般般﹐但我猜﹐這邊的醫生都在這裡那麼久了﹐可以人夾人緣不夾他吧﹐所以照看可也!
天呀... 有無咁多藥呀....
神經的嗎?! 不過看得醫生就要食藥啦﹐但.... 真係嚇死人.... 希望佢D藥Ok啦.....
當年我還是學生一名﹐就喜歡上學時拿著飲品﹐邊走邊喝...
某個年代﹐每一天早上都與好友同事不用特別相約的形式在茶餐廳吃早餐 (早到早等、食飽就走)﹐其實不大在意那碗是什麼麵或是通粉﹐最緊要的還是那杯凍奶茶....
在手錶公司的年代.... 早餐不用吃﹐前往大快活﹐只是要買一杯凍奶茶﹐那份量還是未回到公司那座的電梯大堂就已喝完....
到檢貨公司年代﹐每早都幫襯屋企樓下的Circle K一罐凍咖啡﹐改轉去凍咖啡﹐只因罐裝奶茶不好喝﹐但美心又太遠了....
到宜家﹐咖啡店公司(不是香港啊!)﹐初初來到時﹐咖啡機都不敢按﹐怕按錯了超爆瘀又唔好飲﹐但後來﹐同事說... 公司的咖啡不懶的!!! 那我才試一試味.... 好喝未王於﹐難喝又不是﹐反正是OOKK囉...
婚前﹐只喝齋啡﹐去水腫嘛﹐喝得都可能麻目了﹐因為後期﹐不加水都沒大感覺﹐但婚後﹐不知是不是神經都回來了﹐覺得齋啡好難飲.... 第一朝喝時﹐係支持不住﹐半杯後就放棄了....
然後嘛... 見朝早咁多人係凱詩買奶茶咖啡﹐自己又每早都經過﹐我又試下先﹐試過之後﹐天呀.... 我會不會又上癮了....
又上癮咁唔掂喎﹐一變成習慣的話﹐好難戒o架.... 要制止!! 要制止!! 要制止!!
今日出城 (撞鬼咯... 出城喎...)﹐炸完個頭之後﹐打算食D o野先至番屋企﹐今時今日係油尖旺行一轉絕對唔係易事...
行一條街﹐有大量o既行李箱同你擦身而過﹐我地o既國內同胞﹐拖住大量o既行李周圍去遊覽﹐我唔係唔俾你地咁做﹐但有時真係好鬼煩﹐特別某 D 街道已經夠晒窄﹐佢地拖住個o急周圍去不特止﹐仲興突然Dup Break﹐唉... 就係咁﹐成日俾人撞囉(嚴格來說係俾行李撞)。今日事發地點係加老威﹐奇怪o勒... 加老威D o野都好多係佢地度拎番黎賣格﹐點解佢地要特登黎香港睇呢?? (情況同香港人去日本係有D唔同格﹐因為係日本搵到Made In China果D產品﹐品質真係有D保證的!!)
墨麵新居附近有一家主要做大陸客的酒店﹐所以夜晚如果係屋企附近o既超市或便利店行﹐就會同好多同胞一齊迫﹐當然啦... 附近好多食店都靠晒佢地為生﹐但我地想落街買少少o野的就又係煩死了﹐明明三分鐘可以拎完買完出黎行番屋企﹐但佢地就係收銀機前揀左揀右﹐一陣話用信用卡、轉頭又話用港幣﹐再唔係﹐搵搵下港幣就問可唔可以用人民幣.... 我睇得出前面同我一樣係街坊的顧客﹐同我一樣都反白眼﹐心諗﹐你地可唔可以快小小﹐再唔係佢地同行o既友人突然衝出話要買多幾樣﹐其實如果你地未揀完就慢慢行o下先啦﹐你地黎遊覽好應該慢慢Shopping﹐不如你俾我結帳先啦....；另外﹐佢地仲要成個家族o既人企晒係人地個出口﹐我地就算講唔該借借都無用﹐係完全出唔到店舖﹐一係... 就要化身纜球員將佢地撞開....
其實我唔係想岐視佢地呀﹐不過黎香港旅遊興奮還興奮﹐可唔可以提供小小方便俾我地呀....
係網友仔果邊見到一篇婚禮用的歌﹐我又整番篇先!!
首先先講幾首特別用途o既歌先... 我相信人人都覺得自己揀o既成長片段首歌好特別o架啦﹐我都唔例外!
大半年前﹐我已經開始留意D歌o架喇﹐應該搵邊首哩? 都好頭痕o下﹐初初想用飛輪海同 S.H.E. 的『新窩』﹐有打電話俾我o既朋友都知﹐我手機都係哩一首﹐點解鐘意?! 鐘意係自某次睇到佢地o既歌詞﹐好開心、好輕鬆、同埋好溫馨；不過由於一來阿麵唔鐘意哩首 (聽完我講無反應咪即係唔鐘意囉) 
有一日﹐係車上面聽歌﹐巧合地聽到媽媽叫爸爸特地將泰山 (商台成日同阿蘇去食o野果個泰山) 唱o既Say Yes錄在落USB係車聽﹐噫... 究竟哩首歌講咩o架哩?! 問阿麵﹐佢話咪果套『101次求婚』o既主題曲囉﹐然後我就叫佢幫我搵搵究竟首歌講咩.... 當然最後睇完覺得好正喎... 問阿麵好唔好﹐佢哩次有反應喇﹐仲舉腳讚成添!! 所以就拍在板揀哩一首﹐就算之後都有再搵有無邊首更好﹐都無其他歌o岩喇!
然後... 因為不停揀晚宴播o既歌﹐收集在好多歌；我想自己揀歌﹐覺得就算廣東歌都無所謂﹐最緊要首歌o既意思o岩用；因為唔記得在邊次去婚宴﹐有人可能將果D雜錦情歌CD就咁播﹐播播下播在首『好手分手』出黎﹐點可以咁o架!!!!! 
之前我都有諗... 究竟上菜歌用咩好呢? 我唔想用D太嘈o既歌﹐都頭痕在好耐o架﹐直至到11月尾好友o既婚宴﹐佢用在Kelly首囍菜﹐不過未到果首歌時我地以為已經播緊﹐係我地仲未估到o既時候﹐有人問『係咪大長今』呀? 好彩佢最後唔係大長今o即﹐因為哩一個事件就令我諗起大長今都係一個好選擇喎! 聽晒大長今o既Sound Track﹐最後揀在『蓮實』﹐一首通常一播時﹐個畫面都係長今係樹切切煮煮煲o既情景.... 同埋另有一個好處﹐就係個音樂有一D中樂係入面﹐同聘珍個場 - 有D中式Feel 好襯!! 我記得我上菜果陣都聽到個音樂﹐我自己就好鐘意o勒﹐唔知來賓覺得O唔Ok呢?
敬酒係另一頭痛﹐我唔想揀過年歌o丫.... 我又唔係慶新年﹐最後只係揀在三首﹐係日本版龍貓、新窩 (終於用到喇)、同埋今天我要嫁給你﹐本來 Last果兩日問網友仔有咩推介﹐佢地都有俾D 選擇我﹐不過最後因為太忙﹐已經唔得閒整喇!!
去到送客... 我一早已經諗定﹐想用Disney放完煙火後o既果首A Whole New World、每一個明天﹐仲有幾首不過已經唔係好記得。
好o勒... 黎個Summary o丫﹐好讓大家有個參考啦。
成長片段：Say Yes (Chage & Aska)
上菜：蓮實 (大長今)
即日剪片：In Love With You (Jacky Cheung & Regine)
敬酒：今天我要嫁給你 (蔡依琳 & 陶吉吉)﹐龍貓 (原裝日文版)﹐新窩 - (飛輪海 & S.H.E.)
送客：千與千尋﹐A World New World (送客)﹐Tonight, I Celebrate My Love (送客)﹐一切很美只因有你 - (Kelly Chen)﹐每一個明天
晚宴中途： Beauty and the Beast﹐流星雨﹐I Swear﹐我願意﹐小玩意﹐以妳為榮﹐等妳願意Marry Me﹐二人行一日後﹐幸福摩天輪﹐愛很簡單﹐分分鐘需要你﹐情非得已﹐大浪漫主意﹐Love Paradise﹐感激我遇見﹐小酒窩﹐Because I Love You﹐一生愛你一個﹐etc etc
婚後... 睇到權哥D相... 我敢講... 全日我最鐘意o既係我o既褂Look!
一早預在要 D媽媽級o既人陪我去揀﹐哩 D咁傳統o既o野﹐我點敢自作主張?! 加上我又點會識揀哩﹐所以要媽媽同我去睇；叫佢去睇o既時候﹐佢又係果句.... 『唔急啦!! 慢慢先。』幾時佢先至開始急呢? 就係當契媽問佢：『你同個女睇在褂未呀? 仲唔睇呀?? 俾人揀晒咯....』都話o架啦.... 我講o既o野永遠都無力﹐如果要話樣樣o野都唔聽屋企人話﹐其實我地都係半斤八兩姐。
當佢未肯去睇o既時候﹐我自己已經去睇在一次﹐諗住感受下先﹐同埋Short List定D店啦﹐無謂到我同媽媽去o既時候先至慢慢行。第一間去在永隆! 但我都唔明點解 D 舖頭咁得意的﹐雖然你地哩D傳統服飾、亦都靠口碑﹐都可以執一執果本相簿掛﹐但... 佢地本相簿係N年前o既超級舊款黎囉﹐所以睇都無用。負責小姐俾二件我睇以經攪到我眼花暸亂﹐同埋我打算望下姐﹐唔會攪住人地咁耐啦﹐所以都睇得唔湯唔水。之後無耐﹐某星期六特登去冠南華行下﹐個Auntie拎在幾件俾我﹐又係睇到一頭霧水﹐自此之後就唔敢自己去睇﹐直至媽媽出聲果陣o勒。
陪媽媽睇的之前一晚﹐途經旺角﹐走入去美華望望﹐老闆娘拎在一件俾我睇﹐今次我有DD概念喇﹐不過又係望在一眼就同老闆娘講﹐我想知咩價錢同埋要帶埋媽媽先至可以租! 第二日﹐同媽媽及另一位Auntie一齊去睇褂﹐第一間去番美華﹐入到去超多人﹐當時阿老闆係無咩禮貌的﹐但我明知網友們通報﹐唔駛理阿老闆﹐直接搵老闆娘啦。老闆娘問我想要邊類﹐我話想試多紅果D﹐咁佢拎在一套我睇﹐媽媽同Auntie話：『一般般啦﹐好新抱仔feel。』(其實自己都覺得有小小說不出的古怪) 然後媽媽問老闆娘仲有無其他款﹐老闆娘拎在第二套我睇﹐我本身唔想要咁多金銀線﹐驚老氣﹐哩一套係大五福 (宜家果套)﹐著上身覺得... um... 人家都唔係要咁樣﹐但望鏡﹐都Ok o既... 但媽媽同Auntie就連連說好﹐仲話襯得我白雪雪云云；然後媽媽話：『老闆娘﹐仲有無D更勁o既黎試o下?! 』我心諗... 唔係化....
經過錦發﹐果期佢地o既comment都幾差o下﹐所以直行直過走在!
去到永隆﹐劉姑娘招呼我地﹐俾在一件我睇﹐著上身﹐媽媽又係話一般般﹐但手袖過長﹐到Auntie問劉姑娘佢幾錢租﹐價錢貴過美華果套；要多一件試﹐媽媽話太多金色﹐唔o岩我同埋唔o岩Size﹐成件大晒﹐劉姑娘竟然同我地講可以改Size﹐真係聞所未聞呀!! 跟住佢地仲自動減價﹐Auntie覺得佢唔老實開大價﹐最大件事係Size邊有得改o架?! 所以媽媽同Auntie都打晒眼色話走啦走啦!!! 咁又係... 感覺真係唔多好。
然後去埋冠南華﹐等在好耐﹐媽媽開始唔耐煩﹐仲不停講美華果件咪幾好囉又行來行去
番去美華﹐Target番之前o既大五福﹐再試上身；可能一次過試在幾間﹐我都開始鐘意哩一套喇﹐沾沾自喜之餘仲落埋訂。
映相啦....笑~~~ (但我其實係著住波鞋o架囉。)
其實我同麵都係鐘意係大會堂註冊o架﹐不過... 大懞o既我地﹐一直以為肯俾附加費就有得註冊﹐但某次係Book在酒樓後﹐阿麵出差時上網Check才驚覺﹐我地Big Day日﹐全港註冊署都係唔開格!
有一刻心情跌落谷底﹐點解~~ 點解~~ ﹐點解唔俾我地去政府註冊署呀???!!
然後... 無法子啦﹐政府o野無得攪﹐佢唔會因你而改變﹐唯有轉投私營的證婚場地；黎到哩一步﹐好多人會問﹐做咩唔做酒樓證婚呀? 多人睇好多喎云云﹐又唔駛走黎走去；多人睇又如何﹐我地唔鐘意個氣氛哩﹐見過好幾次o既席上證婚﹐坐後面o既Feel唔到坐前面o既喜悅﹐然後坐得後o既檯 D人就會係度玩、傾計﹐甚至有小孩子哭聲之類﹐仲有D唔夠專業o既監禮人控制唔到場面至令到現場好似街市咁﹐哩D我地一概唔想係我地o既婚禮上面出現。同埋... 想來見證的﹐就算你遠到明明住新界、晚宴係新界但行禮係伯大尼 (港島地鐵都不到的位置) 都會來﹐不要看的﹐在他們面前他們也可不專心﹐所以... 在那證婚跟本不是問題。
走過好幾間證婚場﹐睇過晒之後﹐都係比較喜愛奇妙姻典﹐愛死那像教堂一樣的裝飾；回家問四老我們去這些證婚場有沒有問題﹐他們都說無﹐然後九秒九就去Book場! 誰不知訂場後幾日﹐我媽跟Auntie們說起我去證婚場﹐一個二個都跟我媽說『o下﹐咁麻煩? 周圍走。』然後一整年媽媽三時五刻在投訴我幹嘛那麼麻煩；一來場已Book﹐二來我們不喜歡晚宴證婚﹐所以她有她說﹐我有我不管的一直至大婚那日；其實都好驚中間有什麼出錯﹐然後又給機會投訴﹐幸好那天氣氛極好﹐大家在我們證婚後都很熱切很有氣氛﹐婚禮後媽都說『氣氛幾好喎。』係哩! 係哩! 未見過就別投訴了哩!!
我地係奇妙姻典只Join了證婚儀式﹐所以都算很順利﹐本來想用自己證婚的歌曲﹐都因想順順利利免出錯而用上奇妙姻典提供的歌曲、介指枕及一切他們的提議﹐可幸的是事事順利﹐他們的MC小姐都很好﹐很熟悉證婚流程﹐同埋用上了對講機﹐不會有門外跟堂內不協調的情況出現。但聞說Join了酒會的就多很多東西要小心了﹐包括食物及飲品夠不夠﹐還好我們都不用擔心太多。
像真度都算Ok o架喇... 映相靚 D 係正常o既~~
努力研習可煮得到的菜﹐更去書店看書偷師﹐其實很多食材都想不起﹐所以想不出什麼點子。今日研究天使麵﹐原來好易煮熟哩!!
材料....
本來都有買西芹的﹐不過唔記得添置刨﹐所以西芹未能出場.... 或者.... 下次先啦....
係咪發現唔見在D白菜仔哩?! 因為越諗越古怪﹐最後佢係落得白烚o既下場。
夠味喎... 新鮮蕃茄煮o架!! 好味o架哩!!
仲有一盒聽日Lunch食! Yeah Yeah~~
檢討：
1. 天使麵太軟了... 下次會轉用意粉!!
2. 一般菜譜說15分鐘的.... 記住係泛指齋煮o既時間﹐係唔計洗同切o架!!
3. 我會乖乖地盡快去買番條圍裙!
4. 我會努力再研發.... 及.... 要奉行一係齋煮、一係齋洗﹐如果唔係我對手真係搽多多Cream都唔掂!!
今日相公不在家﹐飛去出差了!!! 所以他只有睇的份兒.... 哈哈哈哈.....
花球!
開始攪時覺得慢慢唔遲啦‧‧遲D先攪﹐後來因為準備映Match Frame﹐都要的起心肝搵一個﹐經網友仔介紹Trinice﹐再睇過佢地D Comment都幾Ok又專做新娘花球類的單﹐見係咁﹐先訂個絲花球先啦。
一見就喜歡的款式﹐只是覺得有點貴﹐網上有D平D的﹐不過款式唔多﹐同埋有人報料話Trinice o既絲花好似真花﹐麵話貴小小唔緊要啦.... 咁就訂在喇!! 初初打算映晒全部Pre-Wedding然後Big Day拎黎拋﹐不過最後太鐘意所以據為己有﹐宜家仲坐在係屋企個花樽度! 接佢番屋企o既時候已經非常小心﹐屋企都未番到就帶佢去揀個靚靚花樽以面『責』埋一邊致變形! 我帶過佢去映相好多次﹐次次任何人見到都話靚﹐ Good Choice!
由於買絲花Experience良好﹐兼夾Big Day花球最緊要穩陣﹐未幾已經上埋Trinice訂埋Big Day鮮花﹐幸好趕得切係加價前 Hold 價﹐幾好! 幾好!
12月尾大婚﹐11月尾已經收到吳小姐電話提我上去揀花﹐最後我拖到差不多十二月十日左右才定花款﹐本來極度喜愛鮮紅玫瑰﹐但經mua同吳小姐分別俾我o既意見﹐如果我唔係 Big Day 要 Elegance 的 Style 就唔好揀鮮紅玫瑰﹐因為鮮紅玫瑰所出黎o既感覺一定係高貴的﹐但其他花我又唔係咁鐘意﹐左睇右睇﹐想揀繡球﹐但吳小姐好堅決話繡球做花球真係太危險了﹐一決水就殘﹐唔建議用除非我好堅持﹐有時專業人士o既意見都應該聽o既﹐最後揀在香檳金玫瑰。
麵話都幾好﹐又唔會好大路人人一樣﹐又唔會同我格格不入‧‧同日訂埋四大長老的襟花﹐四位用晒深粉紅蕙蘭! 好靚!
但兄弟姊妹花呢? 當時係仲未決定的﹐因為我心裡面想用真花﹐但吳小姐同阿麵都話絲花較穩陣﹐因為兄弟姊妹佢地不停走黎走去好易殘；一星期後﹐我堅持用鮮花! 靚 D同埋有花香開心D! 用咩花..? 我用玫瑰﹐咁佢地都用玫瑰啦! 就粉紅色玫瑰啦!
婚前幾日﹐終於有時間去花墟打個轉﹐因為化妝小姐話叫我準備一D花用黎Set頭﹐去到花墟﹐見到有隻奶白色玫瑰﹐心諗﹐我諗我唔係哩隻花掛.... 係就死喇﹐咁白﹐實俾阿媽鬧死!! 九秒九衝上去同吳小姐講﹐我要轉花呀﹐我隻花太淺色﹐實俾阿媽鬧死!! 吳小姐好好記性﹐唔駛睇單就知我訂隻咩花﹐即刻開張相俾我睇話我訂果隻唔淺o架喎；咁我同佢講我係花墟睇到o既o野﹐仲俾一張我偷影o既相佢睇﹐然後佢話我知﹐我睇到果隻乳名叫牛奶妹﹐唔係我揀果隻黎o架! 同我講﹐我揀果隻成朵橙色然後花瓣邊係深色的﹐我再三確定我揀果隻o既顏色後就連連向吳小姐道謝就離開了。
婚前一日﹐係指定時間去接D花番屋企﹐因為係Public Holiday﹐Trinice只有一位小姐負責等我地﹐去到時果位小姐話﹐今日最多花係你o丫....然後就拎出三盒半花俾我﹐好勁呀!!! 而我個花球就額外一束﹐仲用營養水養住﹐好靚o丫!!!! 我見到o既時候真係好開心呀!!! 而Big Day日佢都好靚﹐不過唔知係咪我揀o既係玫瑰o既關係﹐Trinice送o既主花頭花唔係好多﹐有兩朵橙玫瑰、兩朵白玫瑰、兩朵紅玫瑰同埋一D 紅豆花﹐但我見過另一個小姐係其他花種但就大袋D碎花。
Big Day後﹐哩束花足足係屋企養在一個半星期先至殘﹐品質唔錯。
Book酒席時已經知道有送 CDL Coupon﹐一直在爭扎要不要映﹐一來CDL哩D大公司並非我地真係有興趣的Pre-Wedding公司﹐二來﹐玩一日但又唔要幾多張相都係比較浪費時間的﹐不過後尾諗諗o下... 映埋啦﹐自然的有、型格的有、要埋豪華的都Ok o既...
本來打算唔Upgrade﹐映在揀相先算﹐但係ESD 各位網友仔都話如果有心要番相底的﹐就一開始Upgrade會比較化算﹐去到CDL總店﹐當然Sales姐姐都會不斷說服你Upgrade有咩好有咩好﹐對我地黎講比較重視的就係是否Weekend映相! 如果我地兩個都要用Annual Leave去映又覺得無鬼聊﹐最後低頭Upgrade在去最基本o既Plan﹐可以weekend映同揀相﹐多一件婚紗﹐同埋將大相轉在兩相入相簿的相；點解唔要大相?? 婚禮過後處理大相怕麻煩﹐所以... 入埋相簿要多張更實制。
無疑... CDL哩類o既公司設備完善﹐D場景仲好Colorful﹐不過真係好.... Standard﹐相對開我地映Match Frame哩D﹐局我地係一個地方度映實在係太悶喇!!! 婚紗由於身型所限﹐其實唔算好多好吸引o既款可以著﹐加上佢地本揀衫o既相簿脫晒色亂七八糟更令我失去揀衫o既意欲；映相日我化妝時﹐我這位睡寶未婚夫 (當時係嘛) 仲係人地張梳化上面瞓在幾覺﹐每轉一次妝瞓一次! 拍醒佢叫佢起身就埋位映相『笑!』時佢都未醒晒﹐佢其實係有D三魂唔見在七魄﹐所以佢揀相時完全無心機揀﹐佢話『你揀啦... 我對哩輯無咩感覺。』連靚唔靚佢都無Comment。
笨蕉的我上身﹐其實早知始終都upgrade﹐我寧願拎哩張Coupon去Monalisa當一千蚊用﹐總覺得佢地D景靚D個場大D﹐仲可以係珀麗灣映街景﹐但錢已俾先黎後悔真係太遲﹐我只可以繼續話自己笨蕉。(按：喜歡Monalisa多D純粹個人喜好。)
揀相時由幾位網友仔相伴﹐佢地好好人﹐幫手出招Out晒D一望就知有問題o既相﹐其實映相時見攝影師好似咁好心機都有D期望﹐但睇相時就勁失望﹐點解咁樣取角度o架﹐我哩D無做開o既都唔會咁映啦﹐所以Out相Out得勁快! 有一D佢地覺得好的俾我一手就反轉在﹐其中一位網友仔呆了問我... 『果張映得你男友好靚仔喎!!』我答『另一輯有張差不多一樣的更靚仔!』哈哈.... 一班每人有幾輯相係手o既人去揀相係特別恨的﹐連Sales姐姐都自覺不便多言而走開了﹐最後用在45分鐘就係CDL行出門口了。
係ESD識在好多同一日結婚o既朋友仔；到四月中﹐眼見大家都有最少一套Pre-Wedding係手﹐自己卻遲遲未映﹐好心急想即刻映哩﹐係網路上面不停的在睇有無D平平地o既Pre-Wedding映呢? 睇下睇下﹐睇到哩一間Volia Nouveau!
個名何來我不管了﹐反正見到佢地D相幾 Stylish! 心想有 Match Frame咁自然o既Style﹐不如映輯平平地Stylish D o丫.... 去過佢地 Studio 睇過Sample﹐覺得應該都無問題o丫﹐咁就Join在!
我都攪唔清楚係佢地意思定我o既意思﹐去在一個佢地熟到不得了但我地未去過o既地方映相 - 大埔海濱公園﹐由開始Travelling計四小時﹐由於當時油麵仲未考鑊車牌﹐所以果日就由我駕爸爸架車去映相﹐哩一個就係一個敗點﹐點解?! 由於我唔係佢地Studio裝好身先至出發﹐佢地無為意要幫我拎埋個鋼紗! 同埋唔知道無帶頸鍊!! 唉... 都已經去到新界咯... 可以點o即﹐除在『是旦啦』之外真係仲可以做D咩?! 好彩我條裙唔著鋼紗都唔係好覺﹐否則老水都反去Studio然後再出黎! 開始映無耐我發現﹐噫... 咁夠光都要打燈?! 不過哩個係佢地Style﹐我都無多問﹐因為搵得佢地映就要相信佢地!
因為我對於佢地映Studio好有興趣﹐所以四小時入面﹐只係公園留在大約二個半小時就要啟程回Studio﹐所以公園係行唔晒﹐連果個景點(如船頭咁樣果度)都無去度! 番到Studio映多一個鐘左右就完成了﹐並即日揀相! 果日好攰呀... 個人散晒﹐唔知係唔係太急哩... 拎相時先至發現好多相都差不多... 話就話平平地﹐其實曬完相之後都唔算真係好平﹐如果唔係自己心急﹐就唔駛洗多哩一份錢了...
外景...
Studio景...
化妝師阿石(人家女仔黎o架)都幫我化得幾好﹐雖然個髮型同Match Frame第一個妝好接近﹐但你咪話... 我覺得阿石個頭Set得靚D o架...
攝影師Ankit﹐同阿石係拖友﹐其實佢都算映得唔錯﹐不過佢地街景都打燈﹐出黎係就係型﹐不過我有朋友話D相好似係Key我地個人上去。
攪結婚初期﹐覺得一輯好靚o既婚照就夠啦!! 所以同油麵都 Target 搵一間可以達到我地目的o既婚紗攝影公司﹐無諗過搵大公司﹐因為大公司限制多﹐同埋上年有兩對朋友結婚﹐雖然佢地互不認識﹐但兩輯o既婚照出來的效果真係差不多的﹐景差不多、Pose差不多﹐我唔想映一輯人人都有o既婚照﹐所以好努力咁去睇資料﹐搵唔同o既公司﹐最後我地決定在幫趁 Match Frame。
Join Match Frame 係因為 Freeman﹐亦都因為 Cici (靚女Model )﹐佢地係北海道教堂仔果輯真係好正﹐當然... 我地無咁多『筆直』去北海道映﹐咁見過 Freeman 香港映果D都好好﹐所以就 Join 啦﹐我好記得我地第二次Expo﹐係現場再行多三間先至坐低同Freeman confirm Package 的﹐我仲記得﹐Freeman第一句就話『好多謝你地對我o既信任呀』。
映果日好開心﹐亦好期待睇靚相﹐點知二個星期後﹐傳出 Freeman 突然離職o既消息﹐包括Angel (化妝師)﹐門市職員自辯話一直以來 D 相都係徒弟仔阿 Mike 執的﹐但我一直攪咁耐佢地都好自豪話係由攝影師自己執相﹐夠晒原汁原味；由於相已映﹐無得重來﹐唯有焗住上。相執到出黎﹐都唔可以話唔Ok o既﹐不過有D o野執極都執得唔好﹐就算明明唔關事都好啦﹐我覺得同阿 Mike 執相o既功力有關﹐無法子啦﹐都要叫佢地執喇﹐不過有D執完出黎﹐總係覺得唔知點咁樣。
大相簿仲好後仲有手尾跟﹐因為有一張因打燈問題攪到阿麵塊面滿面鬍鬚咁樣﹐天呀... 暈咁滯﹐初期佢地推說話執相時候我地無指出所以相簿照造﹐喂! 宜家你地係專業定我係專業呀? 同埋係電腦芒睇有D o野睇漏係唔奇的﹐你又唔係晒大相俾我睇執漏；最後係屋企再三睇相時再發現其他問題﹐有一張我地執相時指出的化妝問題﹐睇執漏時佢地堅持果樣o野曬完相係無問題﹐最後呢? 最後係大相簿俾我見到自己好似變在Panda眼! 然後二話不說拎番晒D相簿俾佢地要求重造﹐並指出該問題﹐佢地無奈但無再堅持﹐重新幫我再造過一本。
收番晒D相之後都覺得ok啦﹐都算滿意o既﹐但始終無由Freeman執相始終有欠完美﹐不過其他人唔知中間發生o既事.... 咁當大家睇相都同我講 D 相好靚好自然時我都已經放下心頭大石的了。
很愛的其中一張....
好想要結婚蛋糕!
可是酒席並不送結婚蛋糕!!
又唔鐘意果個蛋糕模型!!!
唯一可以做的就係我地自己去俾錢訂啦!!!!
一直有留意結婚蛋糕的資訊﹐一直有看Complete Deelite﹐覺得佢地做Cake好有Heart! 亦看過Cake 2﹐傳言水準每況愈下﹐後來終於的起心肝約Cake 2試蛋糕﹐試過之後﹐喜愛的糖箱蛋糕被放棄了﹐我覺得我o既來賓應該唔會好鐘意糖箱蛋糕....
婚前一星期﹐最後打算去東海堂訂蛋糕﹐誰不知人家名店在聖誕期間不送貨!!! 哼!!! 好叻咩!!! 我去第二間訂!!! 最後去在聖安娜。因為只為切蛋糕﹐幾大個並不是問題﹐所以只訂在揀好款o既minimum size! 五磅!
定了四時半至五點半送蛋糕﹐我睇住佢近五點送到!!
要切蛋糕係我自己o既意願﹐其實都好驚無人幫襯﹐還好﹐當我切蛋糕後轉妝﹐叫Carmen去食﹐點知佢已經同我講『D 蛋糕無晒喇。』
咁即係話﹐各位會切真餅o既新人們﹐蛋糕一定要趁大家餓餓地時切先會食得晒o架! 好過要自己宴客後拎番屋企呀!
年年都有一篇回顧﹐不過今年全年差不多都專注在係婚禮上面。可能... 可以打o既可能就係每一個月係婚事上面攪在D咩﹐所以... 概括的說就好了!
係2009的12月26日﹐名字上的稱謂就多了『李太』兩個字﹐哎唷.... 事無大小唔該大家繼續稱呼我做小姐啦﹐唔想顯得太過老成o丫!
另一方面﹐原來Big Day日開始﹐每每聽見人家講恭喜說話就是『三年抱兩』或『早生貴子』﹐基本上超過90%的人都是一樣的﹐不打緊.... 我知道大家為我而著急；以前過年就會被問『幾時結婚呀?』﹐今年打後就會變成『幾時生 B 呀?』唔同階段﹐所面對o既o野真係唔同的!
搬屋真係一門好深o既學問﹐現在仍存放在老家的物件﹐正在煩惱該點樣搬﹐我真的好多垃圾o丫! 不過睇黎都係會由得佢地直至雜物被驅逐出境為止!!
從今開始每晚就要諗搵D咩做晚餐﹐有D咩好帶黎做Lunch﹐唔整咩... 食唔到咁多餐街飯﹐整咩... 就會變成超級煮飯婆﹐唔係喇... 要推油麵出黎做煮飯佬至得!
雖然已經過在好幾日﹐依然恭祝大家新年快樂!!!
