10日旅遊後‧‧回來了!

我地番來咯~~~

 

 

10日Honeymoon話咁快『o雪』一聲就過在﹐成個旅程好古怪地由我去排大約地點﹐但點樣去果個目的地﹐有D係麵係旅程前一晚睇究竟撘乜車去邊度；例如....

 

 

點樣去新宿御苑呀?

我就識寫個目的地出黎﹐但點去呀...? 就留番旅程前一晚﹐當我與周小姐商討第二日去邊時﹐麵就坐係櫈上面慢慢研究Metro邊條線轉邊一條線會係最近去目的地的。

 

 

人家去旅行食飯可能會盡試新點子﹐我地都算係係地o既.... 不過.... 都係依歸番究竟大家想食邊類型o既o野﹐所以... 同一檔拉麵可以Encore﹐咁迴轉壽司當然都可以Encore啦! 明明有興趣試Shabu Shabu﹐但二人住溫泉酒店果晚果碟唔係好多o既薄切豚都飽到頂心口 + 二人勁怕一身打邊爐味歷久不退而放棄了﹐好笨o既二人組呀!

 

 

落雨、落雨、再落雨係我地其中幾日頭痛非常o既天氣狀況﹐某晚係新宿街頭﹐鞋子濕透入水、寒風刺骨到面無表情的墨﹐依然記得那難頂o既感覺﹐頂癮o既係走果日天空放晴仲要係藍色的!! (那雙入水的鞋當然會長眠日本啦!!)

 

 

番到香港﹐一撘完機場巴士下車時﹐腦海裡想的不是日本拉麵或魚生刺身﹐反而是係家裡廚櫃入面的那包大福字麵、樓下茶餐廳的車仔麵及自家飯煲煮的白米飯!

 

 

雖然我係咁樣講﹐不過唔代表哩次旅程唔好玩﹐係軽井沢街頭踩著單車找我們Book了、而新幹線職員指示說那在地圖上只需10分鐘就到的旅店；係軽井沢偶遇飄雪後﹐成架單車都變得一撻撻的雪痕跡；睇相靚到絕﹐但去到現場就像破店一樣的浪漫小教堂；見到日本靚靚便當盒﹐明明飽到不行﹐都要買一個上車吃﹐雖然最後有三份二的飯都往麵的肚子裡送；太過預得少時間﹐回程飛機起飛1820﹐卻在1745時於Terminal 2推著行李飛快跑往櫃位﹐人家都說"Counter Closed"了﹐好彩.... 地勤職員沒說什麼﹐只是不停對講機來對講機往﹐我猜他們的對話大約會是『有兩個懞丙宜家才到閘口』。

 

 

說實話﹐都沒買什麼手信﹐特別是當你走在日本﹐發現眼看的大部份東西都有人買來送到香港賣的時候﹐還買什麼手信﹐香港都有在賣哩!!!

 

 

記憶在腦子﹐這次的感受都在心中﹐會盡可能盡快執好然後揀選一些跟大家分享啦!!