裙褂 - 美華繡莊

婚後... 睇到權哥D相... 我敢講... 全日我最鐘意o既係我o既褂Look!

 

一早預在要 D媽媽級o既人陪我去揀﹐哩 D咁傳統o既o野﹐我點敢自作主張?! 加上我又點會識揀哩﹐所以要媽媽同我去睇；叫佢去睇o既時候﹐佢又係果句.... 『唔急啦!! 慢慢先。』幾時佢先至開始急呢? 就係當契媽問佢：『你同個女睇在褂未呀? 仲唔睇呀?? 俾人揀晒咯....』都話o架啦.... 我講o既o野永遠都無力﹐如果要話樣樣o野都唔聽屋企人話﹐其實我地都係半斤八兩姐。

 

當佢未肯去睇o既時候﹐我自己已經去睇在一次﹐諗住感受下先﹐同埋Short List定D店啦﹐無謂到我同媽媽去o既時候先至慢慢行。第一間去在永隆! 但我都唔明點解 D 舖頭咁得意的﹐雖然你地哩D傳統服飾、亦都靠口碑﹐都可以執一執果本相簿掛﹐但... 佢地本相簿係N年前o既超級舊款黎囉﹐所以睇都無用。負責小姐俾二件我睇以經攪到我眼花暸亂﹐同埋我打算望下姐﹐唔會攪住人地咁耐啦﹐所以都睇得唔湯唔水。之後無耐﹐某星期六特登去冠南華行下﹐個Auntie拎在幾件俾我﹐又係睇到一頭霧水﹐自此之後就唔敢自己去睇﹐直至媽媽出聲果陣o勒。

 

陪媽媽睇的之前一晚﹐途經旺角﹐走入去美華望望﹐老闆娘拎在一件俾我睇﹐今次我有DD概念喇﹐不過又係望在一眼就同老闆娘講﹐我想知咩價錢同埋要帶埋媽媽先至可以租! 第二日﹐同媽媽及另一位Auntie一齊去睇褂﹐第一間去番美華﹐入到去超多人﹐當時阿老闆係無咩禮貌的﹐但我明知網友們通報﹐唔駛理阿老闆﹐直接搵老闆娘啦。老闆娘問我想要邊類﹐我話想試多紅果D﹐咁佢拎在一套我睇﹐媽媽同Auntie話：『一般般啦﹐好新抱仔feel。』(其實自己都覺得有小小說不出的古怪) 然後媽媽問老闆娘仲有無其他款﹐老闆娘拎在第二套我睇﹐我本身唔想要咁多金銀線﹐驚老氣﹐哩一套係大五福 (宜家果套)﹐著上身覺得... um... 人家都唔係要咁樣﹐但望鏡﹐都Ok o既... 但媽媽同Auntie就連連說好﹐仲話襯得我白雪雪云云；然後媽媽話：『老闆娘﹐仲有無D更勁o既黎試o下?! 』我心諗... 唔係化.... 老闆娘拎在套褂皇過我﹐著在上身好似機械人咁﹐Oh... NO~ !!!! 然後再穿多次那大五福 (宜家果套)﹐照多幾次鏡﹐覺得都Ok o既﹐不過都想去第二度睇睇﹐不過可能試在三件仲話要走添﹐老闆娘有點不悅﹐但唔理得咁多喇﹐梗係睇埋先啦!

 

經過錦發﹐果期佢地o既comment都幾差o下﹐所以直行直過走在!

 

去到永隆﹐劉姑娘招呼我地﹐俾在一件我睇﹐著上身﹐媽媽又係話一般般﹐但手袖過長﹐到Auntie問劉姑娘佢幾錢租﹐價錢貴過美華果套；要多一件試﹐媽媽話太多金色﹐唔o岩我同埋唔o岩Size﹐成件大晒﹐劉姑娘竟然同我地講可以改Size﹐真係聞所未聞呀!! 跟住佢地仲自動減價﹐Auntie覺得佢唔老實開大價﹐最大件事係Size邊有得改o架?! 所以媽媽同Auntie都打晒眼色話走啦走啦!!! 咁又係... 感覺真係唔多好。

 

然後去埋冠南華﹐等在好耐﹐媽媽開始唔耐煩﹐仲不停講美華果件咪幾好囉又行來行去；終於有得試喇﹐不過唔知點解﹐哩位Sales Auntie拎出黎o既幾件都麻麻地﹐但隔離試緊果個姐姐仔果D就好靚囉﹐我試果D仲拉鍊位車得唔靚添﹐哩度租一件﹐做得美華兩件半o架嘛﹐如果唔滿意梗係唔租啦。最後因為開始頂唔順喇﹐又攰、媽媽佢地o既耐性都用得七七八八﹐所以飛快番去美華啦﹐行都費是﹐即刻撘的士添。

 

番去美華﹐Target番之前o既大五福﹐再試上身；可能一次過試在幾間﹐我都開始鐘意哩一套喇﹐沾沾自喜之餘仲落埋訂。

 

映相啦....笑~~~ (但我其實係著住波鞋o架囉。)