媽媽衫

繼上星期同媽媽去睇衫﹐今個星期拍板啦! 一個唔該﹐真夠快手﹐連未來奶奶都係今日揀埋衫了!!

 

 

媽媽本來就已經做在一件﹐後尾係金巴利道再睇中一件﹐哩... 果間同Sales嘈到火紅火綠果件哩﹐最後都係不敵現實﹐後兜了!!! 咁事實比係紫水晶果件Modern o既﹐貴小小就貴小小啦.... 今日有契媽陪同去睇﹐係妝嫁樓下對面有間鞋店﹐媽媽下車時就話鐘意果對豆零跟既鞋﹐試衫時又不停同契媽研究果對鞋好唔好‧‧

 

契媽話：『密頭鞋好D喎。』

媽話：『著晚裝係著哩D o架嘛﹐我會Gel甲o架嘛。』

佢地互相講在幾次‧‧

契媽就話：『唉﹐你鐘意啦﹐不過我覺得密頭鞋大方D囉。』

 

其實我都覺得密頭鞋好D﹐不過有小小心諗﹐唉‧‧講你都唔聽o架啦﹐話知你﹐映相出黎如果唔好睇你唔好怨就得o勒。

 

 

攪掂小墨媽件衫﹐麵亦都約在佢媽媽去金都度睇衫﹐仲約埋佢嫂嫂幫眼。上星期去過金都打個轉﹐睇在樓下果間﹐應該都有款會o岩麵媽的﹐所以第一站就帶在佢去睇先o勒。

 

 

一開始﹐毫無頭緒﹐都唔知點入手﹐Sales Auntie問麵媽想要邊D﹐麵媽都講唔出﹐後尾我搵D覺得佢應該會o岩的﹐但麵媽覺得太時髦?!?! (竟然太時髦?!?! 我媽覺得我揀果D好老套o架哇。)然後Sales Auntie就搵在件絲絨的俾麵媽﹐噫... 麵媽覺得Ok喎﹐然後叫Sales Auntie再拎多少少款出黎研究研究﹐其實都係絲絨的﹐但哩間唔租無得試﹐所以麵媽同麵嫂嫂後尾話行下先啦‧‧可憐麵爸就跟住我地呆呆咁行晒成個金都!

 

 

睇在好多間﹐大部份店員都好落力勁Sell﹐但我因為聽聞大量金都黑店﹐其實我都好驚踩屎。第一間有得試的﹐同樓下第一間款式差不多但貴差不多一半價錢﹐試完覺得一般般﹐五人再向前行﹐今日金都多人到o丫~~~~~ 其實麵媽一見D淺色就話麻麻地囉...

 

 

後尾行下行下﹐上到頂樓﹐小墨媽租衫果間﹐麵嫂嫂見有得試喎... 所以就貢入去睇下﹐然後睇睇下﹐有件好似幾Ok的﹐店員話可以試的﹐咁又試下啦... 著上身幾Ok 喎! 左照照、右照照﹐試第二件﹐oh... 哩年款式比較舊‧‧然後差不多想拍板﹐麵嫂嫂拎在一件淺色的﹐話‧‧不如試件淺色啦...然後我又加句﹐可能會有意想不到o既效果喎! 其實未同佢黎睇之前... 我覺得金色、粉紅色呀果D應該會顯得麵媽精神唔錯﹐奈何佢一見淺色就頭fing fing‧‧‧

 

 

佢一試出黎! Wow﹐好好喎!!! 淺色咪幾好!! 又精神又Sharp﹐我同麵嫂嫂都同聲讚賞呀!!! 又一次証明我揀o既o野都唔錯o丫!! 本來麵媽話租一件就夠﹐但由於小墨媽都兩件﹐公平起見我覺得麵媽果晚都換換衫好D.... 就係咁樣﹐今日就Confirm晒D媽媽衫喇。