Match Frame 揀相日

尋晚終於都去Match Frame揀相喇。

 

 

咁Final相數一定有加啦﹐係討價還價之後﹐加錢主要買Softcopy﹐同埋買在細相簿﹐可以入晒D相﹐而Softcopy又可以由佢地執番﹐原汁原味D。

 

 

開始睇相時巧遇阿Mic回Office﹐同佢打過招呼﹐但話晒係佢地舖頭﹐我都不便多言﹐本來想閒聊兩句問問佢工作有點點改變有無影響或辛苦晒佢幫我地執相哩D客套說話都全吞回肚裡。但希望對阿Mic黎講﹐工作都係開心o架啦。

 

 

講番D相﹐其實有部份比預期中失望﹐如石澳石灘果邊﹐企好近好近浪果D相﹐唔係Freeman映得唔好﹐而係我o既笑容﹐睇得出係好驚D浪擁埋黎或者太好風而吹到阿麵個頭亂七八糟﹐不過咁﹐如果唔好風又何來大浪果D相哩﹐所以唯有係哩堆入面揀覺得比較好o既一D啦。

 

 

係廠景、石澳、同埋山頂o既景入面﹐其實山頂係比較失望o既﹐可能因為塞車﹐去到都已經好晏喇﹐唔係映得好耐﹐同埋我係三個妝入面比較無咁鐘意o既一個﹐條裙靚就靚o勒﹐不過無在D Ruffles﹐就等於無o野睇﹐不過尋日睇相其實D相都好﹐係未做細執﹐所以有小小大隻妹﹐細執完可能好好多。最意外應該係麵啦﹐平時只見棚骨的佢﹐鏡頭下有大量雙下巴呀!!!

 

 

三個星期後就可以去睇D相執好晒o既版本喇﹐然後再揀邊D入大相簿﹐邊張做細相架同埋大相。尋晚我同佢地拎在三張Softcopy呀﹐其中一張係Studio入面執好在o既相﹐Wowowoo... 好正o丫!!!!