回想小時中秋節

又到一年一度o既中秋節喇﹐哈哈.. 但係我又無街去喇﹐無錯﹐我又留守係屋企喇。今年連阿朗都有o野玩﹐佢話同D同學去公園玩蠟燭﹐連阿朗都有o野玩﹐但我都係搵周公為樂。

 

 

其實阿朗已經比我地細個果陣少在好多回憶

；我細個住七層大廈﹐連學都未番﹐已經見住姑姐拉叔佢地點蠟燭﹐玩燈籠﹐我細個仲興有『走馬燈』﹐你地記唔記得咩係『走馬燈』??

係一舊中間可以放一個燈泡﹐set好在之後個燈Warm Up一陣先至識轉

﹐不停轉﹐好似宜家係維園見到果D大型花燈o既mini size黎﹐掛在係屋企o既中間﹐我最鐘意企係下面﹐花燈轉、我自己又係度轉

﹐好得意!

『走馬燈』仲可以用完一年收好出年再用﹐所以睇住姑姐好好心機咁將佢抹好然後放入床下底﹐等下年佢先可以重出生天﹐唔似得宜家D o野成日用完一年就掉﹐好浪費。

 

 

另外﹐七層大廈仲好鐘意家家户户走晒出走廊

﹐大人有大人打144﹐細路周圍走

﹐由巷頭跑到巷尾﹐打個圈又去番巷頭；會扭計要買燈籠﹐但玻璃紙燈籠好容易熱熔﹐然後就有人係度喊

﹐呵呵呵呵... 又或者拎住個燈籠﹐望住支蠟燭係度閃下閃下；頭先先至講起﹐小墨爸曾經整過一個牛奶罐o既玩意俾我當燈籠玩﹐細細個嫲嫲會買煉奶

﹐哩... 拎黎食西多果D啊!! 然後搵支鐵線穿過個罐﹐再加一個線轆係個底﹐加多支蠟燭跟住就可以一路行一路推個罐而佢又係地上面轉喇﹐越跑得快越轉得快哩!!

仲有冷巷有好多位可以俾我地點蠟燭﹐最鐘意點到每一格都有一支著在o既蠟燭﹐不過成日一有風就一次過吹熄晒。

 

 

不過﹐宜家就無哩D玩啦﹐哩一代o既細路就無晒哩D o野﹐連燈籠都變成入電仲曉播歌果種﹐有咩好玩喎。

 

 

唉... 好懷念啊~~