小墨的胡思亂想

2007年12月8日星期六

周身唔妥

早就講在﹐小墨真係... 都唔知係化學定怕死﹐要醫o既o野都真係唔少

。早於兩年前已經開始睇醫生﹐醫我果條都唔係點樣攪出毛病o既腰骨﹐睇在兩年、轉過兩個醫生﹐咁中間係有停頓過o既﹐雖然就黎斷尾﹐但哩段時間所洗o既醫藥費真係... 好勁!!

除在腰骨、仲有頸骨﹐張醫師話我第二節頸骨歪在﹐所以唔容易去水腫﹐成日塊面都脹卜卜﹐其實主因唔係肥(雖然都有點點關係)﹐但主要係循環系統唔係好妥!! 但都差不多醫好喇﹐就黎唔駛再睇醫生喇。

點知...

當就黎唔駛睇醫生﹐張醫師又突然有事番在北京哩一段時間﹐有一晚小墨係睡夢中突然覺得條頸劇痛難擋

﹐人都醒埋﹐我都唔係好知發生咩事﹐只係知突然條頸好痛﹐痛到覺得係平時張醫師擰我條頸o既幾倍痛楚﹐但當然﹐喝睡中o既小墨﹐自我按頸幾下之後覺得無咁痛就繼續訓啦﹐訓覺大過天嘛

。但係第二日起身﹐全日都覺得條頸同膊頭極度拉緊﹐痛在大半日﹐無法子﹐唯有找大圍醫師救命!!!

晚上去到醫師度﹐講佢聽咩唔妥﹐大醫師話：『我估你應該係訓訓下覺轉身時﹐身郁頭唔郁所以扭親自己啦﹐你係咪好攰啊?? 訓到唔願郁哩... 你睇你條頸﹐好明顯真係扭親啦! 』跟住小墨條頸就由大醫師左按按、右擰擰﹐之後就無咁痛o勒。咁都未算﹐早兩日隻手腕唔知咩事痛﹐自己用跌打酒摔摔﹐雖然好似無咁痛但又覺得有D o野唔妥﹐話俾醫師聽叫佢順便睇埋﹐佢話唔知點解我手骨又係歪在﹐所以痛﹐然後佢又係我手擰擰、按按﹐嘰呱鬼叫o既小墨不停係度叫救命

小墨：『嘩... 好痛啊!!

嘩.. 咩事啊?!?! 嘩嘩嘩... 超痛﹐o丫o丫嘩... 肉黎o架
﹐嘩.. 救命啊
﹐咩事手仲痛過醫腰骨o架
﹐嘩... 哇.... 啊....攪錯啊.... 哇....哇....哇.... 救命....
』

尖叫聲此起彼落﹐唔知o既真係以為我被謀殺

﹐無... 醫師擰完一陣叫我唔好郁一陣﹐過在幾分鐘﹐醫師番來話﹐點啊﹐隻手仲痛唔痛﹐我答佢『痺到七彩

』但佢話應該Ok o架喇﹐應該之後無事o架喇咁囉。

不過今朝摺被時唔知係咪又整親隻手﹐以前果種痛感又回來了!!!

不過﹐我打算等張醫師回來再俾佢醫﹐唔係大圍醫師唔得﹐不過反正張醫師未睇完﹐下次俾張醫師睇埋啦﹐不過都咪話唔煩﹐一身哩度唔妥果度唔妥﹐我究竟幾時先可以自如D﹐乜醫生都唔駛睇啊??

2007年12月7日星期五

細細個就食佢!!

哩幾日不停俾人驗出有問題o既梅林牌午餐肉罐頭!! 記得細細個o既時候﹐嫲嫲只會買哩一個牌子o既午餐肉﹐細個俾孻叔恐嚇：『哩D咪就係你隻兔仔D肉黎o架囉!!』嚇到我有一段時間唔敢食

。當然﹐孻叔講o既o野又點及嫲嫲咁權威﹐嫲嫲話唔係﹐小墨就信唔係﹐所以繼續開開心心食午餐肉

。所以係我腦入面﹐午餐肉只有哩一個牌子o架咋!!

但... 小墨媽唔鐘意哩個o麥頭﹐她只會買有隻豬係個罐果一隻﹐自始﹐經過『掃把市場』﹐只可以對佢遠觀﹐卻不能食

!!! 成日係度諗﹐死啦... 我唔幫襯﹐佢會唔會無晒生意?? (有人當正自己係霹靂粉絲) 不過... 自哩件事之後﹐可能... 佢真係會越來越少人幫襯了咧....

2007年12月5日星期三

新生活

今日開始在我新的一頁﹐無錯﹐我番新工喇!!! 哩一份工o既行業同之前完全唔同﹐no more Audit﹐no more inspection﹐無COP﹐無OO。

但真係好慘啊!! 朝早番工番8:30am﹐簡直係慘情到不得之了﹐之前一日我仲發惡夢﹐夢見自己明明番8:30am但九點仲係屋企訓緊﹐好有壓力添!! 因為唔習慣哩一個時間!! 但番得早又放得早﹐早到... 如果唔駛OT﹐我番到屋企仲可以睇無線六點鐘果套... 好似叫『伙頭智多星』﹐我有無記錯個名?? Anyway﹐係差不多六點開場果套啦!! 雖然放得早同埋唔駛同咁多心迫地鐵﹐但心理上都係寧願番9:00am放5:30pm﹐宜家如果約朋友放工去街﹐真係可以番屋企變完身先再出街!!

另外﹐哩間公司好多人都好斯文﹐HR好溫柔、自己同事講o野細細聲﹐連Department Head都係斯斯文文咁款﹐雖然.. 佢地話只不過係佢未『發作』!! 但相比起以前BV o既瘋狂年代﹐哩D真係小意思啦﹐咩叫瘋狂佢地都未見過啊!! 同埋佢地係肯投資到﹐公司為在鼓勵員工﹐連校歌都創製埋﹐仲拍埋MTV添﹐我睇完之後差D連個下巴都趺埋落地；HR仲話﹐聖誕節﹐每個員工都有一Set酒店出品o既火雞贈送俾D員工﹐都好『Dum』本啊!!!

繼續努力適應新生活 now...