連續濕度達9x%的幾日後﹐二人耐不住掠極都唔乾的衫﹐終於買在部抽濕機!
有諗過駛唔駛買大部D、多Function D﹐不過考慮過後﹐其實我地主要都係要抽乾D衫﹐唔好掠極都唔乾﹐同埋.... 以前老家都係用緊同一牌子o既同一個升數﹐So Far用在咁多年都Ok o丫﹐最好o既係﹐係同升數o既抽濕機中﹐哩部係唯一可以乖乖地企係床下底o既一部。(都要考慮埋唔用時擺邊o架嘛...)
其實... 經星空先生提醒﹐我地係有考慮過直接將D衫拎落街磅洗﹐不過我好擔心如果無良o既洗衣店﹐用太高溫烘乾導致縮水﹐到時鐘意o既衫玩完的話﹐我咪仲頭痕!!
我本身係鐘意Pan記果部多D o架... 不過... 佢太高喇~~ 哩部... 剛剛好...
係初初初頭時﹐我地確係有諗買二人檯﹐不過睇清楚以後覺得.... 未免太鬼鼠了﹐想二人同時用檯有點妄想﹐所以開始同麵講﹐二人檯太細了....
有段時期我地研究圓檯﹐無腳位嘛﹐不過好友們紛紛出言提醒唔好﹐話好浪費位置云云。
早兩星期前﹐媽媽幫我係九龍某商場看到一張應該幾適合我地o既飯檯! 外型非常Ok﹐因為是可伸縮的橢圓形檯!! 上星期六送貨了....
先拉出來...
兩邊都打開後的Size...
收檯後...
好慳位呀~~~~
然後... 星期日那天﹐去Ikea配了兩張櫈....訂貨後今晚順道去提貨....
阿麵開工喇...
掂喎﹐算幾快手哩....
Yeah.... 砌好了!!!
正!
墨麵的窩由新曆七月尾開始動工﹐到今日﹐終於都入傢俬喇﹐好感動喔~~~
由於阿部寬執漏執得超慢﹐我同阿麵都無氣對佢﹐乜佢唔想收尾數o架咩? 點會黎到尾先至放慢晒手腳?! 係忍佢唔住o既情況下﹐上星期六confirm今個星期頭先清一次屋﹐然後星期三入傢俬﹐才再進行最後執漏。
星期一放工上未來新居﹐眼見只係清晒D膠板走﹐地下仲有一Pet生膠類物體漏晒係地下﹐心諗：『天呀... 咪話在約好星期三入傢俬囉﹐咁就叫做執在?! 想點?! 』阿麵一早已經請好假星期二做執屋仔﹐小墨眼見如此境況﹐當然無可能就手旁觀﹐乖乖地星期二晏晝都請埋假來做抹屋妹﹐星期三晏晝再請假同麵二人親手收傢俬；尋日抹在半日﹐心已經嬲阿部寬﹐連電話都費是打俾佢﹐叻o既連尾數都唔好收o丫笨! 尋晚離場時地板灰曚曚抹極都抹唔甩﹐心裡屈悶之極﹐覺得﹐咪以後腳踩地板都好像踩灰咁?! 對最鐘意係屋企赤腳o既小墨黎講﹐非常痛苦!
點知... 今日入到新屋﹐想開門之際﹐噫... 點解屋裡面有人對話o既聲音o既?! 開門正發現... 有兩位嬸嬸係樹進行全屋清潔! 發mo 阿部寬早講o丫.... 咁我地兩個尋日唔駛抹得咁辛苦﹐腰都酸呀陰公! 我地唔知點抹好o既o野﹐嬸嬸手到拿來的就抹好﹐我頭痕唔知點清o既膠紙﹐嬸嬸仲抹得好似好輕鬆添﹐唉....~~ 最緊要o既地板﹐當我地同嬸嬸講轉頭會入傢俬﹐佢地仲二話不說就即用特殊清潔濟同鏟﹐輕輕鬆的就將我尋晚耿耿於懷唔知點攪好o既地板係十幾分鐘入面攪好。我真係覺得嬸嬸們係最緊要o既時段出現﹐多謝多謝!~!!! 不過就好嬲阿部寬講o野天一半地一半﹐攪到我地用在大半日去攪嬸嬸們可能只需二、三小時就完成o既工作!!!
係嬸嬸們努力幫我地清潔地板之際﹐傢俬店送貨喇﹐o丫.... 佢地兩位師傅又幾好喎﹐一邊入貨一邊好小心咁幫我地就住就住﹐可能因為我地係度掛﹐佢地都幾小心﹐一件一件拆同安裝﹐我同麵就唯有企入廚房﹐好似去在動物園咁﹐隔住玻璃度望住兩位嬸嬸抹屋同兩位師傅安裝；o丫.... 係呀﹐因為我地個廚房幅牆﹐有一半變在係玻璃﹐所以Open Kitchen又Open唔晒﹐總之.... 煮緊飯同洗碗都可以繼續追電視劇啦!!! 我地好滿意我地哩個做法同埋多謝某報o既家居版﹐如果無記錯﹐果份應該係生果報來的﹐哇哈哈...
講在咁耐... 放DD清潔相俾大家睇啦。
抹屋二人組.... 被嬸嬸叫我地行入房﹐因為房剛抹好﹐叫我地稍等﹐唔好周圍行住喇....
嬸嬸們努力進行廳地板的清潔中!
抹好後的地板.... 會有些反光的﹐昨晚灰曚曚的消失得無影無蹤! 嬸嬸! 勁呀!
房間睡床安裝進行中.... 廳中一片凌亂....
遊動物園中....
噢... 無Lu.... 我映到哩度就停在手了.... 當然到嬸嬸們跟師傅離場後我地要再進行多一次清潔﹐因為傢俬在大陸工廠那邊都存放了近三個星期﹐很多沙塵哩﹐不過相對來說﹐實在比尋日輕鬆得多了....
墨麵的窩由新曆七月尾開始裝修﹐由於衰仔阿部寬知道我地唔急入住﹐拖拖地我地間屋黎整﹐唔知好彩定唔好彩﹐遲了訂傢俬﹐但又因為衰仔遲在交單位﹐竟然傢俬都做好在﹐佢都未交屋!!! 衰仔!!!!
今個星期﹐竟然用足一個星期就係清垃圾﹐豈有此理；星期五下晝﹐佢終於打電話俾油麵﹐話我地可以去睇執漏喇!!
雖然我地唔係整得金碧輝煌﹐但總算依我地o既喜好去整的!! 整屋構思黎自.....
1. 市面上各式家居設計雜誌 (小墨可是花了好幾個旁晚站在商務偷看人家的裝修系列至頸梗膊痛的!)﹐中間只買了三本薄版設計書刊 (要戒掉買『婚禮』嘛...唯有轉買小量其他雜誌先 )；
2. 行Ikea時看見喜歡的東西會跑埋去﹐並流露出非常喜愛的神情；
3. 行賣浴室潔具店時﹐按著很喜歡的洗手盆視線攻擊大人考慮該款式；
4. B&Q未關門時﹐會去玩人家的洗手盤及馬桶﹐並扮『廁所中』....；
5. 行走於帝朗、興發什至五金舖裡面找合心水的廚廁用品；
到現在比較15/16的﹐主要係牆的顏色...
首先... 是房的綠色﹐別見笑﹐我很喜歡的啦﹐反正現在的房間仔也是綠的!
最想研究廳的藍色﹐對比房的顏色﹐廳的藍好像不夠藍﹐也許是燈光問題.... 要轉4100光管嗎?!?! 還是加油一種比較鮮的藍好呢??
小墨身高不足﹐但爐頭因要就洗衣機的高度﹐在某Blog﹐找出一張圖做踏腳的﹐照辦也做一個吧... 不過原來那相的辦本就比較像櫃桶的....﹐不做這腳踏的話﹐我以後就只可以做洗碗大將軍﹐因為... 有點不夠高看爐頭呀!
明天我地就會聯同阿部寬一齊看執漏﹐現在再去Edit 一下那表先.....
由於阿部寬成日D o野一係唔問﹐佢一問就即刻想要答案或想我地即刻買好貨品﹐但係大家都知... 砵蘭街D舖頭同我地番工一樣的﹐我地開工佢開工﹐我地收工佢收工﹐所以.... 我怕在佢喇﹐唔等佢叫﹐我地自動自覺去買在小小潔具先!
先來廁所吧... 其實阿部寬的裝修Package是包的﹐不過... 我地見佢果個無o麥頭﹐而之前問佢﹐佢話如果我地有心唔用佢提供果個﹐咪係大數扣五舊﹐咁即係買一個都係補錢姐﹐咁... 不如考慮下買個有o麥頭的啦?! 會不會安全小小? 其實去行潔具店﹐如果要睇廁所﹐都會尷尷尬尬的﹐因為唔係好敢好用力的放晒手腳坐落去﹐超尷尬喔!!
行在咁耐都唔明﹐點解有D廁所成三千幾四千一個﹐坐在係上面曉飛麼?! 定係會暢通D?? 後尾要買o勒﹐先細心咁睇﹐原來係水箱會一件過咁出定係兩件頭....
我好唔鐘意下面哩一類‧‧在我眼中佢個樣好笨‧‧
哈哈... 我地最後都係買在個有牌子中的平凡版... 雖然有說哩個牌子已經唔係外國造﹐但唔緊要啦... 個品牌都唔會玩死自己的‧‧希望Ok 啦!!
新屋準備得如火如荼﹐浴室廚房牆磚舖好了、企缸做好了、浴室地磚、全屋地磚都舖好了﹐燈糟都做好了﹐木工才剛離場﹐看來下一步就係油牆了﹐但二人星期五晚到新屋檢視就發現有東西做錯了!
是廳跟廚房中間Set玻璃的木架﹐放錯了位o丫! 令已經又窄又長的廳更窄啦! 我地二人除除檢查還有什麼不當後﹐就發現都沒有了... 就打電話給阿部寬問清楚究竟。
經過星期六阿部寬親身去現場檢查及同麵嗟商後﹐結論係........木架要重做!! 衰仔梗係推三推四啦﹐重做喎﹐就算再俾錢﹐都花掉師傅一番心機﹐看他的情況應該是怕得罪師傅﹐但唔攪唔得呀﹐唔攪難道已經要聞電視的沙發﹐要變成並排嗎?! No Way! 同埋木架太長了﹐要做短小小﹐否則好『雅咋』；他Check過以後﹐師傅要下星期尾才來重新再整﹐無問題... 我地唔等住入伙﹐俾多一星期你又有什麼所謂哩...
係哩個 Item上面﹐雖然... 可能都要Share番小部份費用﹐但阿麵抵讚o丫!! 佢將軍到阿部寬唔敢Say... 要找木工師傅救架。而小墨只需係屋企繼續印印腳上網‧‧Hehe....
開始整屋到宜家﹐超過在一個月。So Far都OOKK﹐係死人頭阿部寬有時幾無記性﹐同埋日頭同佢講o野佢就好似係Site開緊工﹐無耐性聽我地講o野咁。
不過... 如果夜晚打俾佢會好好多﹐會可以慢慢問﹐慢慢傾﹐大家都可以多D representation﹐咁我都明o既﹐如果係Site做緊o野﹐仲可能係人地個Site喎﹐咁唔方便講太多都好o岩o既﹐算! 哩樣我地唯有將D o野拖到夜晚先黎問你。咁so far... 都還可以o野...
咩衰人我地遇到所以咁勞氣呢?! 就係個發 mo 冷氣師傅o勒!
雖然從中我地有好多相熟朋友伸出友誼之手幫忙找『電視框』﹐誰不知格價格得七七八八準備落order時﹐突然殺出一個程坳金﹐係觀塘某電器店發現最平o既冷氣機!! 二人想了幾晚覺得已經不能再拖﹐同埋裝電器有時同咩Dealer係無關的﹐只會同運氣有關﹐所以Confirm哩度係行貨仲最平就入去落柯打!!
正如很多消費者一樣﹐我地入店時打算買一個牌子﹐但正式落單都係被哄買了另一款差不多的牌子﹐原因不外乎製冷差不多、比較靜、比較慳電之類﹐最緊要係佢地果部唔知有無做過手腳的Sample冷氣機﹐唉.... 我地想買果個牌子真係比較嘈﹐而又再想想家裡的冷氣又有類似的反應﹐係... 算啦... 搏下啦o既心態驅使下﹐乖乖付錢買了一部本來沒有研究過的冷氣機。
本來在剛過去的星期六安裝的﹐星期五晚師傅來電﹐說星期六來不了﹐要星期一才到﹐本來打算星期六去一去現場﹐順道跟泥水師傅打個招呼的二人﹐突然沒有了行程﹐也就沒有突地走入去看工程了；然後﹐尋晚以為裝好冷氣﹐打算去好好把冷氣包紮﹐誰不知打開門﹐冷氣位依然空空如也!! 打電話問阿部寬知唔知發生什麼事﹐阿部寬就說冷氣師傅打給他說要明天才到! 好了... 到今日中午時份﹐差不多到午飯時候﹐阿部寬說依然未見有冷氣師傅到﹐麵打電話去找師傅﹐並告知泥水師傅要去午飯了﹐要跟他們夾好才去呀﹐那冷氣師傅冷冷就答『得啦』然後啪一聲收了阿麵線!! 豈有此理﹐宜家改時間o既係你﹐無尾飛佗o既係你﹐仲要咁臭脾氣?!
咪以為事件就此告一段落﹐仲有下文...
下午阿部寬打電話來說：『壞消息喎。』原來那發 mo 冷氣師傅為求自己方便﹐竟踏上去我地仍在準備中的企缸泥水內﹐累泥水師傅要重做這泥水﹐最衰格o既係一句聲都無出就逃之夭夭﹐都唔知係咪特登的! 到今晚我地再去現場﹐雖然該位置已補好﹐我地發現廁所鋁窗給拆下來了﹐我地以為係阿部寬的工人拆的﹐因為冷氣後的鋁架跟鋁窗太近﹐然後跟他在傾其他事時﹐他才說：『無呀﹐個死佬亂咁拆我D窗?! o下... 佢肯定亂掉D鏍絲啦唉.....我D泥水工點會攪鋁窗o即。』又係喎... 哩個死人冷氣佬真係死佬黎o架﹐咁鬼過份都有o既?! 嫌我地無屋主在場俾Tips呀?? 你番去食自己啦﹐我地星期六你黎裝咪有Tips囉﹐係你自己唔裝re-schedule咋嘛﹐咁唔通我特登番黎恭候你光臨咩發mo!
阿部寛一直都建議我地做特色牆。
唔係話唔好﹐不過睇過阿部寬之前整過D屋﹐D屋主一係唔整﹐一整就整得好厲害﹐黑色喎﹐嚇死人啦... 所以我地一直猶豫不決﹐介乎係想整與唔整之間；特色牆﹐話明特色﹐整完唔覺就唔特色啦﹐太驚嚇咩﹐又覺得屋企整到咁勁做咩...
後尾早幾晚係旺角終於都有睇中在牆紙款!!
珍珠色﹐並正中阿麵『一定要光猛』o既概念﹐因為係有小小反光o架! 睇完哩一隻之後﹐其他果D無一隻我地有掂o既感覺... 我地應該已經搵到『係佢喇』o既牆紙了。
不過多事小墨又覺得﹐其實如果揀隻特別D顏色o既油黎油牆﹐咁都唔錯o丫‧‧係ICI網頁﹐就有一頁係色辦黎﹐我好鐘意隻黃色喎! 如果只油一黃色牆﹐然後其他油再淺多D o既微黃色或米白色﹐咁又如何呢?
仲15/16中呀﹐不過要定o架喇‧‧﹐同埋仲未決定房咩色... 阿麵俾我決定喎﹐我又想淺淺淺綠或淺淺淺藍﹐咪以為好怪﹐我宜家間房﹐媽媽當日就係揀在淺綠色牆紙﹐我到今日都仲係好鐘意。Hehe..
尋日仲係砵蘭街決定埋窗台加雲石o既塊添﹐不過哩個偷映唔到... 同埋都揀定了﹐阿麵話唔駛買Sample石仔啦~~~
真係發癲喇﹐明明Confirm在o既o野﹐突然又有變掛....
師傅上黎未來屋企睇完位之後﹐同我地講匹半可能只會僅僅夠廳用﹐如果有人客來就可能會熱熱地o勒。另外﹐係各大Forum再睇﹐OMG~~~ 係無咩人會裝日立分體的﹐向好幾家冷氣專賣店 + 連鎖店Sales們問多點點資料﹐佢地都很少推薦日立的﹐這幾個消息就將我地本來諗完o既o野推倒重來‧‧
哩幾晚巡遊於旺角、太子﹐找回那幾家店去八掛八掛﹐其實最好彩是還沒有正式落單﹐所以要轉款、轉Model、甚至轉公司都係完全無困難的。其中某連鎖店Sales哥哥非常好人﹐不停促我地必須要問清楚管理處可否裝分體﹐千期唔好亂估﹐仲話俾我地聽曾經有例子裝完屋主收大廈律師信﹐告知唔可以裝分體並要即時拆掉﹐所以小墨又試好驚慌的叫麵今日一早打電話回管理處資詢資詢﹐如果唔俾裝﹐我地就即刻改為日立小涼伴唔好煩! 好彩... 天井窗裝分體係無問題的﹐又放下一個難題。
天呀... 兩匹分體比匹半分體貴千幾二千蚊呀﹐好肉痛呀.... 仲未計裝工etc etc﹐然後又研究邊個牌子唔太貴又比較穩當呀﹐仲要計埋室外那機是否可以通過窗口的Size﹐呀~~~ 啊~~~ 哇~~~~ 喔~~~~
我突然遇上選擇困難症呀﹐連選擇究竟係青山道撘車回新居睇進程好定撘車番屋企再開車去睇好都決定唔到呀﹐我地兩個都俾冷氣玩到氹氹轉呀。
大金‧日立‧大金‧日立‧大金‧日立 ~~~~~ 最後勝出的是日立啦!
最近花不少時間在找電器的頭上﹐因為咁多年都只是『食米不知米貴』! 家裡總有小墨媽打點﹐管是什麼東東﹐有得用就用。直至現在﹐自己要準備去買電器﹐OMG﹐究竟邊D好用邊D唔好用呀?!?! 各有評語因為各有用後感﹐我基本上是沒所謂﹐最緊要唔易壞﹐大家都認識的品牌就比較安全吧。
因為未來新居的簡格﹐用窗口機會有點點角度問題﹐冷氣只會吹在牆上面的啊!! 反正我們有天井位﹐分體式都沒關係吧﹐不會阻礙了窗口通風位﹐二人溝通研究過後﹐決定了裝分體式。找了很久﹐怕這怕那下﹐今晚去一家麵以前曾經光顧﹐店齡已有三十多年的小店裡看看﹐天呀.... 怎麼比出面平那麼多的呀?!?! 那哥哥仔非常Aggressive﹐才幾個問題﹐單刀直入的叫我們寫地址﹐給我們安排師傅睇位﹐他的動作快得令我們二人都呆了；然後連連說其實還沒有定案! 這Sales哥哥幹得好! Well Done! 就算我還沒下單子都對佢另眼相看哩。
問題來了!! 現在有好幾個方案‧‧
1. 買一部淨機﹐然後叫阿部寬找人裝機? (安裝費如何呢?!)
2. 直接用此店?! (最便宜的方法!!)
3. 向阿部寬相熟的店買機連裝?! (最貴呀!)
思考過一餐晚飯時間﹐船頭驚賊船尾驚鬼的二人﹐還是決定回這家老自號買機 + 裝工﹐估計有三十年歷史的店不會差得到那裡吧﹐反正是行貨﹐買機加裝工的費用已經是暫時最抵的了(本來九折已在星期一完結﹐但哥哥仔幫忙﹐可以依然Keep埋做九折)!!! Ok! 拍板!! 本來說星期尾才可以﹐然後我問可以兩日內嗎? 快人快語的他就說明天一早啦。小店就是小店﹐彈性真的很大呀!! Good!!!
補充：先在這多謝網友YP的仗義相助﹐比較過後我們在另一店訂了﹐謝謝喔~~
繼續選購新居物品大行動﹐哩次要講o既係火爐! 何解咁早就要研究火爐哩﹐因為要度位做其他o野﹐所以就要早早研究哩一個課題o勒。
早前(唔記得幾耐之前)﹐係笨B媽媽o既日誌發現佢係用電磁爐的﹐媽媽早前亦曾推介電磁爐﹐她朋友的女兒家是用電磁爐的﹐又唔熱、又乾淨云云﹐所以早前係想找多點資料以說服麵棄明火﹐轉用電的﹐不過跟好友談過以後﹐我都覺得... 如果真係有哩D問題﹐咁我都唔要電磁爐了﹐有什麼問題﹐請睇睇以下吧。
1. 燃料唔見得比煤氣真係平好多。
2. 要選用特別質料的鑊與煲才可與電磁波起作用。
3. 煲水煮麵﹐電磁爐看到水滾的狀態比明火爐遲﹐即係肉眼看... 一係唔滾﹐一滾就好滾! 朋友在舊居用了兩年﹐還沒有拿得準下麵的時間﹐到搬走時﹐煮的公仔麵都唔好食的!! (公仔麵都煮得唔好味?!?! 唔係化。)
4. 聞說她那時﹐上手住客很少煮食﹐但兩邊爐頭卻壞掉了一邊。
那當然... 爐的牌子也很重要﹐她那時的電磁爐是什麼品牌已經不記得了﹐但最嚇壞我同麵的係上面的第三點﹐煮麵唔好食好大鑊哇.... 我地成日都要煮麵o架!! 所以我地棄電投明了。
本來裝修公司包了我門煮食爐跟抽油煙機的﹐但我們心理上覺得﹐煮食爐用TGC的會不會安全一點?!?! 最少有壞時﹐TGC的維修速度都很快呀﹐最後同阿部寛傾﹐不要煮食爐﹐反而將抽油煙機Upgrade去上高一個價位的﹐而煮食爐我們再去TGC看!!
當然我地會選現在的嵌入式啦﹐不過原來嵌入式o既火段係有限制的﹐如果要中間芯火﹐就只有兩款可以選擇。其一係‧‧
噢‧‧我覺得佢好醜樣呀.... 點解唔可以成塊都係強化玻璃?!?! 同埋我地研究過﹐中間芯火果D因乜解究係大火D﹐原來上面果條Bar係放空氣入去燃燒的﹐所以係無可避免地要做到咁o既樣....
另外一個問題係就那個架... 好高耶... 光是爐頭上的架已經差不多6cm了‧‧ 另一款可以造得全個Panel黑色的﹐竟然係6.5cm﹐接近7cm高哩.... 
或許最麻煩是... 那個爐實物真的很醜!!
如果買TGC普通的款式(就是沒中間芯火的)就有﹐但... 又怕沒有了中間那個芯火好古怪﹐因為平時屋企那座枱式有的嘛﹐但新的嵌入式就沒有哩﹐真煩。
剛剛在家測試過家裡的爐頭﹐有四段火力。
但新的那些就是沒有了最上那兩個火力。
再另一解決辦法是... 唔用TGC爐啦﹐原來麵的哥哥家是在用國際牌的﹐上去看過又幾好火喎...
但我地要再去珠珠島Site Visit一下先... 但... 好攰呀...
