大約過年時﹐Facebook裡面被Karen Tag在﹐玩 16 items about me。
其實初初轉用Yahoo Blog之後﹐都見到有人玩﹐覺得幾好玩咁﹐可能我無俾人Tag過啦﹐睇一定易過自己寫o既。輪到自己o既時候﹐真係有咁多o野諗唔到﹐諗唔好寫咩、自己有咩特殊、同埋有咩想人知道。所以嘛... 如果再有人Tag﹐我都未必會答喇﹐可能Ignore佢。
係度﹐我Paste多一次啦：
規則：當你比人tag左，就要寫一篇note，內含16項有關你的事情，習慣，喜好，目標....或任何各不相干但有關你的東西。最後tag另外16個人。你必須tag返tag左你的那個人。如果我tag左你，即係我想認識你更深。
Rules: Once you’ve been tagged, you are supposed to write a note with 16 random things, facts, habits, or goals about you. At the end, choose 16 people to be tagged. You have to tag the person who tagged you.
(I was tagged by Karen Tse & Jimmy Li)
1. 其實我真係好鐘意食o野﹐食o野好開心﹐但都帶俾我頭痛﹐因為食多小小就會肥!
2. 好痛恨自己唔爭氣﹐又想瘦、又想食、又唔做運動﹐成日得把口講話下個星期、或下個月、或得天氣無咁凍時開始減肥。
3. 我好奇怪﹐成日想搵下D friend﹐但耐無搵﹐會唔夠膽搵﹐因為越耐無搵﹐就越怕失去共同話題﹐或中間因為甩在好多資料而攪到朋友們講o既共同話題我會唔明。
4. 好鐘意係郊外﹐由高處向遠方一望無際咁望﹐好舒暢!!
5. 好鐘意飛機起飛時﹐Start Engine係跑道上飛馳的感覺﹐好有活力!
6. 我都好想知究竟我幾時先至重新有工作方向、目標﹐所以千期唔好問我究竟想搵份咩工﹐因為我都唔知﹐我只知一日係一間公司度做﹐就要守果間公司o既規矩、制度。
7. 次次功課做Project﹐都希望臻善臻美﹐準備充足﹐但往往有頭威﹐無尾陣﹐草草收場。要諗辦法改下至得。
8. 好希望得到朋友們o既在意﹐究竟係我缺乏自信﹐定係我鐘意Outstanding?
9. 我有個怪癖﹐就算去行街﹐係間舖頭見到D o野亂在﹐我係睇完哩樣o野之後﹐都會好順手睇將佢推番好個位﹐有時都擔心D人以為我係Sales。
10. 講o野有時唔好太絕﹐果D咩『永遠xxx』、『一定唔會xxx』﹐一般最後都會自打咀巴﹐所以我改在喇﹐我只會講『應該唔會喇‧‧』或『唔好喇化‧‧』。
11. 我o既記憶力可能之前係B記已經用得七七八八喇﹐所以你地如果話我記錯o野﹐我唔係好敢好似以前咁大大聲話『唔係喎!! 你錯喇!! 』不過我會小心求證…然後番黎話俾D關事又信任o既人聽『阿乜水佢上次記錯喇!!』
12. 無錯! 我係魚腩! 最好搵我『鄧』腳打麻雀。不過如果咁橋我贏在﹐其實唔關技術事﹐可能係果次小小好運加小量福星高照姐。
13. 小病事福係呃人o架﹐小病仲辛苦過大病o既﹐因為大病可以唔番工係屋企瞓﹐小病依然會番公司報到!
14. 其實我真係好鐘意食飯o架! 白飯都ok o架喇!
15. 我都唔知自己係唔係一個識得Social的人﹐對住D三唔識七o既人但係要合作﹐人地會覺得『噫‧‧你都ok o丫!』﹐但如果叫我去努力咁認識新朋友﹐其實我會覺得好吃力﹐好辛苦﹐心諗『點解要咁特登呀?!』同埋會寧願坐埋一邊唔出聲。
16. 做在司機咁耐﹐總有D開車o既脾性﹐不過我承認﹐我開車已經無以前咁狼死喇﹐宜家反而比新牌仔時細膽得多﹐掟彎前都會Dup Break(以前唔會o架)。
