7仔撈麵宣傳大使

一向我都好鐘意食串串魚蛋、燒賣、魚肉翅哩D小食﹐以前要街邊小販檔先有得賣﹐但佢地已經進駐7仔同Ok便利店好耐喇!!!

初初係7仔推出小食吧﹐後尾連Ok都加入戰圈﹐所以已經有好多便利店有小食供應﹐咁當然太細間果D無啦﹐不過其實已經越來越多了。

 

 

小墨好鐘意食哩D小食﹐無論係上面提及過o既串串魚蛋、燒賣、魚肉翅之外﹐仲有司華力腸、蒸飽﹐而燒賣係要落麻油先好味

。次次去張醫師度﹐我都係佢樓下間Ok食番串咖哩魚蛋﹐再飲盒菊花茶﹐唔會肚餓之餘﹐番屋企先食飯都食得落唔會飽晒。

 

 

今晚本來放工番屋企﹐但爛癮o既小墨都係忍唔住約在PY去玩；由於我相信佢絕唔係特登遲到﹐所以我去到佢公司樓下﹐我都無打電話

催佢﹐不過... 小墨個胃就好想、好想食o野!! (但當時我唔認為係肚餓來的。) 佢公司樓下間7仔都幾攪鬼﹐除在有麵包Corner之外﹐仲有壽司櫃同埋美食吧。即係咁... 自覺係哩度買壽司食就真係好奇怪啊

﹐所以我無咁做﹐行下行下﹐去到美食吧﹐問問阿姐仲有無碗仔翅﹐阿姐話賣晒﹐但後面我見有位小姐好好味咁係度玩緊撈麵(我sure係美食吧o既出品)﹐我就走去Cashier問﹐美食吧係咪有撈麵o架?? 佢話有喎!!!! 咁緊係整番個啦!!

 

 

輪到我食喇﹐哎唷.. 本來唔知係唔係好好味o既o野由一個好想食o野o既人食就梗係咩都好味o架啦(你地唔好同我講叫我食米田共啊!!) 當到我係度o雪o雪咁食麵時

﹐有個女仔o岩o岩食晒燒賣﹐望住我﹐佢好好奇... 就出現以下o既對話喇。

 

 

小姐：噫... 乜... 有撈麵食o架咩??

小墨：er.. 係啊... 係果邊買之嘛。

小姐：噫.. 哩隻係咪印尼果隻撈麵啊?? 果隻味道唔錯o架喎!!!

小墨：er.. 我其實唔係好知啊﹐我見人地食好似好好味﹐咁我買埋一份咋。

小姐：er.. 請問哩碗o野幾錢?

小墨：五個半

小姐：買一個好似兩個幾咋...

小墨：o下... 咁... 出街食o野係咁o架啦...

小姐：咁又係...

 

 

無o丫... 咪以為無下文啊﹐大約五分鐘後﹐哩位小姐自己捧住碗麵係我隔離食之嘛﹐哈哈哈哈....

我覺得都幾攪笑啊 ... 又話貴﹐又忍唔住手﹐嘿嘿嘿嘿﹐無o丫... 咁樣阿7仔又賣多兩碗麵之嘛。呵呵...

 

 

其實個人就覺得Ok D o野好味D﹐佢D咖哩魚蛋真係好味到哩.... 哎唷.... 宜家想即刻食添啊!!!

 

 

另外... 有人放工時無咩Mood﹐以為自己有咩唔開心﹐但又講唔出﹐所以搵街去。點不知﹐食在麵之後回復精靈之嘛﹐咁即係話﹐有人其實係肚餓﹐餓到無心機但自己都唔知之囉

。(鬼叫我餐Lunch係 12:30pm 已經完成咩。)